Infekciya jwqtırğan nauqastarğa arnalğan jalpı palatadağı tösek. I.S.Jekenova atındağı qalalıq klinikalıq jwqpalı aurular auruhanasınıñ Türksib audanındağı filialı. Almatı qalası. 25 naurız 2021 jıl. Foto: QT / Kültegin Aspanwlı

Täuligine 7 mıñnan astam sırqat anııqtalıp jatqan twsta bilik koronavirustan emdeuge arnalğan auruhanalardağı tösek-orın sanın köbeyte almay otır. Türli jağdayda auırıp jatqan 82 mıñ adam üyde emdeluge mäjbür. Tamız ayınıñ alğaşqı dekadasında 79 mıñnan asa sırqat tirkelip, 1269 adam köz jwmdı.

11 tamız tañda ötken Ükimet otırısında densaulıq saqtau ministri Aleksey Coy respublika men öñirlerdegi kovidtik tösek-orın qorınıñ jüktemesi turalı bayandadı.

«Kündelikti monitoring mälimeti boyınşa, öñirlerde ornalasqan 328 medicinalıq nısanda barlığı 55 658 orın bar. 10 tamızdağı derekke say, respublikada tösek-orın qorınıñ 54%-ı toldı. Aymaqtar arasında eñ auır jükteme Atırau oblısı men astanada, ärqaysında 69% tösek-orın tolğan. Sonday-aq, Aqtöbe öñirinde 65%-ğa, Almatı qalası men Jambıl oblısı ärqaysınıñ 63%-ında nauqastar jatır», – dedi Coy.

Qazirgi kezde Qazaqstanda 112 843 adam auırıp jatır. Onıñ 30 181-i auruhanada emdelude, qalğan 82 662 adam ambulatoriyalıq baqılauğa alınğan. Olardı bilik üy jağdayında emdelu qajet dep esepteydi.

Infekciyalıq stacionarlardağı reanimaciya bölimderinde 4969 tösek-orın jwmısqa qosılğan. Onıñ 45%-ı qoldanılıp jatır.

Ministrdiñ aytuınşa,elde epidemiologiyalıq ahual naşarlağan jağdayda qosalqı 7419 orın dayındalğan.

Qazaqstanda koronavirus pen oğan wqsas pnevmoniyağa şaldıqqandar sanı şamamen 8,2 mıñğa artıp, jalpı esebi 720 mıñnan astı. Tek şilde ayında 154 mıñ adam sırqattanıp, 1932 adam (KVI+ 1644, KVI- 288) qaytıs bolğan. Şilde ayınıñ ortasına qaray täuliktik körsetkişi 5 mıñnıñ üstine şıqqan indettiñ törtinşi tolqınında qazir keminde 7 mıñ jağday tirkelip jatır.

Bıltır 13 naurızdan beri COVID-19 infekciyasın jwqtırğandar qatarı 656 mıñnan, 1 tamızdan bılayğı koronavirus pnevmoniyası 64 mıñnan asqan. DDSW derekqorı men Wlttıq statistikada Qazaqstanda auırğandar sanı 720 mıñğa jetti. Degenmen Ükimet koronavirus pen onıñ pnevmoniyasın eki bölek qarastıradı. Sonımen qatar, pandemiya bastalğalı jalpı virus jwqqandardan 13,6 mıñ adam (KVI+ / U07.1 – 7103, KVI- / U07.2 – 3949, ilespe aurulardan – 2633) qaytıs bolğan. Alayda Qazaqstan biligi boyınan koronavirus tabılsa da, sarapşılar men därigerlerdiñ narazılığına qaramastan, basqa aurulardıñ sebebinen qaytıs boldı delingenderdi jalpı statistikağa engizbeydi.

"The Qazaq Times"