Qırğız biligi Orta-Şığıstağı azamattarın elge qaytaruğa küş saluda. Foto: BBC

Qırğızstan Tayau Şığıstağı jihadşılar qatarına qosılğan azamattarın eline qaytaruğa küş saluda. Bwl turalı sol eldiñ Sırtqı ister ministrligi arnayı mälimdeme jasağan. Ükimettiñ tapsırmasımen qwrılğan arnayı jwmıs tobı Süriya men Irak jerindegi qırğızstandıq azamattardı eline qaytaru jwmıstarın qolğa alğan. 

Bwdan bir apta bwrın onnan astam adamnan twratın bastamaşıl top prezidentten Süriyada twtqındalğan jaqındarın elge qaytarıp keludi ötiniş etken. Qırğızstandıq jihadşılardı jäne olardıñ otbası müşelerin eline qaytaru üşin arnayı jwmıs tobı Irak ükimetimen birge azamattardıñ jeke basın kuälandıru jwmıstarın bastap ketken. Qırğız SİM-iniñ mälimdeuinşe, mwnday alğaşqı adımdağı jwmıstar Süriya jerinde de jürilude.

Orta Şığısta qarulı qaqtığıstar bastalğannan beri Qırğızstannan 700-den astam adam jihadşılar qatarına qosılğan. Ekstremistik toptıñ jeteginde ketken keybireui bala-şağasın da soğıs bolıp jatqan elge aparğan. Sondıqtan, Süriya men Irak jerindegi qırğızstandıq äyelder men balalardıñ sanı da jüzden asadı. Bwğan deyin olardıñ eline qaytıp oralğandarı turalı anıq mälimet joq. Al, keybir mälimetterde 100-den astam qırğızstandıq wrıs kezinde qaza tapqan.

Qırğızstannıñ İİM tarabı Süriya men Iraktağı qırğızstandıqtardıñ eline qaytıp keluine eşqanday şekteudiñ joq ekenin aytqan. Degenmen, ekstremizm jäne zañsız migrant retinde jazasın öteytinin aytqan.

Osıdan bwrın, Süriya men Iraktağı lagerlerden habar taratqan francuz jurnalisteri Qırğızstannıñ pasportımen jürgen äyeldi lagerlerdiñ birinen kezdestiredi. Olar onımen qısqa ğana swhbattasqanı bar-tın. Bwl video qırğızstandıq äleumettik jelide küşti talqı taqırıbına aynalğan edi. Olar körşiles orta aziyalıq elderdiñ barlığı da öz azamattarın eline qaytarıp kelgenin alğa tartıp, ükimettiñ därmensizdigin sınğa alğan.

“The Qazaq Times”