قىرعىز بيلىگى ورتا-شىعىستاعى ازاماتتارىن ەلگە قايتارۋعا كۇش سالۋدا. فوتو: BBC

قىرعىزستان تاياۋ شىعىستاعى جيھادشىلار قاتارىنا قوسىلعان ازاماتتارىن ەلىنە قايتارۋعا كۇش سالۋدا. بۇل تۋرالى سول ەلدىڭ سىرتقى ىستەر مينيسترلىگى ارنايى مالىمدەمە جاساعان. ۇكىمەتتىڭ تاپسىرماسىمەن قۇرىلعان ارنايى جۇمىس توبى ءسۇريا مەن يراك جەرىندەگى قىرعىزستاندىق ازاماتتاردى ەلىنە قايتارۋ جۇمىستارىن قولعا العان. 

بۇدان ءبىر اپتا بۇرىن وننان استام ادامنان تۇراتىن باستاماشىل توپ پرەزيدەنتتەن ءسۇريادا تۇتقىندالعان جاقىندارىن ەلگە قايتارىپ كەلۋدى ءوتىنىش ەتكەن. قىرعىزستاندىق جيھادشىلاردى جانە ولاردىڭ وتباسى مۇشەلەرىن ەلىنە قايتارۋ ءۇشىن ارنايى جۇمىس توبى يراك ۇكىمەتىمەن بىرگە ازاماتتاردىڭ جەكە باسىن كۋالاندىرۋ جۇمىستارىن باستاپ كەتكەن. قىرعىز ءسىم-ءىنىڭ مالىمدەۋىنشە، مۇنداي العاشقى ادىمداعى جۇمىستار ءسۇريا جەرىندە دە جۇرىلۋدە.

ورتا شىعىستا قارۋلى قاقتىعىستار باستالعاننان بەرى قىرعىزستاننان 700-دەن استام ادام جيھادشىلار قاتارىنا قوسىلعان. ەكسترەميستىك توپتىڭ جەتەگىندە كەتكەن كەيبىرەۋى بالا-شاعاسىن دا سوعىس بولىپ جاتقان ەلگە اپارعان. سوندىقتان، ءسۇريا مەن يراك جەرىندەگى قىرعىزستاندىق ايەلدەر مەن بالالاردىڭ سانى دا جۇزدەن اسادى. بۇعان دەيىن ولاردىڭ ەلىنە قايتىپ ورالعاندارى تۋرالى انىق مالىمەت جوق. ال، كەيبىر مالىمەتتەردە 100-دەن استام قىرعىزستاندىق ۇرىس كەزىندە قازا تاپقان.

قىرعىزستاننىڭ ءىىم تارابى ءسۇريا مەن يراكتاعى قىرعىزستاندىقتاردىڭ ەلىنە قايتىپ كەلۋىنە ەشقانداي شەكتەۋدىڭ جوق ەكەنىن ايتقان. دەگەنمەن، ەكسترەميزم جانە زاڭسىز ميگرانت رەتىندە جازاسىن وتەيتىنىن ايتقان.

وسىدان بۇرىن، ءسۇريا مەن يراكتاعى لاگەرلەردەن حابار تاراتقان فرانتسۋز جۋرناليستەرى قىرعىزستاننىڭ پاسپورتىمەن جۇرگەن ايەلدى لاگەرلەردىڭ بىرىنەن كەزدەستىرەدى. ولار ونىمەن قىسقا عانا سۇحباتتاسقانى بار-تىن. بۇل ۆيدەو قىرعىزستاندىق الەۋمەتتىك جەلىدە كۇشتى تالقى تاقىرىبىنا اينالعان ەدى. ولار كورشىلەس ورتا ازيالىق ەلدەردىڭ بارلىعى دا ءوز ازاماتتارىن ەلىنە قايتارىپ كەلگەنىن العا تارتىپ، ۇكىمەتتىڭ دارمەنسىزدىگىن سىنعا العان.

“The Qazaq Times”