Foto äleumettik jeliden alındı.

Astana qalasında «Alaş jolı» qozğalısınıñ belsendileri Aydın Egeubaev, Rauşan Qalmomınwlı jäne Qayırlı Omar qamauğa alındı.

Osığan baylanıstı biz «Alaş jolı» qozğalısınıñ müşesi, azamattıq belsendi Maqsat İliyaswlınıñ pikirin bilgen edik. Ol mäseleniñ män-jayın tömendegidey tarqattı:

«Bügin biz tañğı sağat toğızdar şamasında Astana äkimşiligine jer mäselesine baylanıstı 2018 jıldıñ 21 mamırında beybit miting ötkizuge rwqsat beru turalı ötiniş hatımızdı tapsırdıq. Hattı qabıldap aldı. Talonın aldıq. Endi on kün işinde olar rwqsat beretinin nemese bermeytinin aytıp bizge jauap berui tiis. Bwnıñ DVK partiyasınıñ mitingilerine qatısı joq. Biz Europarlament deputattarına hat tapsırayıq dep edik. «Alaş jolı» qoğamdıq birlestik retinde zañsız jabıldı. Onıñ müşeleri Aydın Egeubaev, Rauşan Qalmomınwlı, Qayırlı Omarov, men jäne özge de azamattar wdayı qısım körip kele jatırmız. Bizdiñ Konstituciyalıq qwqıqtarımız wdayı bwzılıp keledi. Sol turalı biz hat jazıp, sol hattı Europarlament deputtatarınıñ qolına wstatamız ba degen ümitimiz bolıp edi. Olarmen kezdesu üşin Europarlamenttiñ Astanadağı ofisına baruğa talpınğan Aydın da, Rauşan da, Qayırlı da ol jerge jete alğan joq. Rauşan Qalmomınwlın Astana qalasınıñ äkimdiginiñ aldınan alıp ketti. Qayırlı Omarovtı köşede ketip bara jatqan jerinen küş körsetip alıp ketti. Aydın Egeubaevqa Europarlamenttiñ ofisına jetpey twrıp küş körsetip, qolın sındırdı. Aydınnıñ qayda ekenin qazir bile almay otırmız. Onı emhanağa alıp ketti me, joq älde DVD-nıñ işinde otır ma belgisiz. Qayırlı sol DVD-nıñ işinde otır. Al Rauşan qazir bosatıldı».

Esteriñizge salayıq, bügin Almatı jäne Astana qalalarında (Qazaqstan aumağında ekstremistik wyım dep tanılğan) DVK partiyasınıñ mitingileri ötude. Mitingke jinalğan azamattar sayasi twtqındardı bosatudı talap etude.

“The Qazaq Times”