فوتو الەۋمەتتىك جەلىدەن الىندى.

استانا قالاسىندا «الاش جولى» قوزعالىسىنىڭ بەلسەندىلەرى ايدىن ەگەۋباەۆ، راۋشان قالمومىنۇلى جانە قايىرلى ومار قاماۋعا الىندى.

وسىعان بايلانىستى ءبىز «الاش جولى» قوزعالىسىنىڭ مۇشەسى، ازاماتتىق بەلسەندى ماقسات ءىلياسۇلىنىڭ پىكىرىن بىلگەن ەدىك. ول ماسەلەنىڭ ءمان-جايىن تومەندەگىدەي تارقاتتى:

«بۇگىن ءبىز تاڭعى ساعات توعىزدار شاماسىندا استانا اكىمشىلىگىنە جەر ماسەلەسىنە بايلانىستى 2018 جىلدىڭ 21 مامىرىندا بەيبىت ميتينگ وتكىزۋگە رۇقسات بەرۋ تۋرالى ءوتىنىش حاتىمىزدى تاپسىردىق. حاتتى قابىلداپ الدى. تالونىن الدىق. ەندى ون كۇن ىشىندە ولار رۇقسات بەرەتىنىن نەمەسە بەرمەيتىنىن ايتىپ بىزگە جاۋاپ بەرۋى ءتيىس. بۇنىڭ دۆك پارتياسىنىڭ ميتينگىلەرىنە قاتىسى جوق. ءبىز ەۋروپارلامەنت دەپۋتاتتارىنا حات تاپسىرايىق دەپ ەدىك. «الاش جولى» قوعامدىق بىرلەستىك رەتىندە زاڭسىز جابىلدى. ونىڭ مۇشەلەرى ايدىن ەگەۋباەۆ، راۋشان قالمومىنۇلى، قايىرلى وماروۆ، مەن جانە وزگە دە ازاماتتار ۇدايى قىسىم كورىپ كەلە جاتىرمىز. ءبىزدىڭ كونستيتۋتسيالىق قۇقىقتارىمىز ۇدايى بۇزىلىپ كەلەدى. سول تۋرالى ءبىز حات جازىپ، سول حاتتى ەۋروپارلامەنت دەپۋتتاتارىنىڭ قولىنا ۇستاتامىز با دەگەن ءۇمىتىمىز بولىپ ەدى. ولارمەن كەزدەسۋ ءۇشىن ەۋروپارلامەنتتىڭ استاناداعى وفيسىنا بارۋعا تالپىنعان ايدىن دا، راۋشان دا، قايىرلى دا ول جەرگە جەتە العان جوق. راۋشان قالمومىنۇلىن استانا قالاسىنىڭ اكىمدىگىنىڭ الدىنان الىپ كەتتى. قايىرلى وماروۆتى كوشەدە كەتىپ بارا جاتقان جەرىنەن كۇش كورسەتىپ الىپ كەتتى. ايدىن ەگەۋباەۆقا ەۋروپارلامەنتتىڭ وفيسىنا جەتپەي تۇرىپ كۇش كورسەتىپ، قولىن سىندىردى. ايدىننىڭ قايدا ەكەنىن قازىر بىلە الماي وتىرمىز. ونى ەمحاناعا الىپ كەتتى مە، جوق الدە دۆد-نىڭ ىشىندە وتىر ما بەلگىسىز. قايىرلى سول دۆد-نىڭ ىشىندە وتىر. ال راۋشان قازىر بوساتىلدى».

ەستەرىڭىزگە سالايىق، بۇگىن الماتى جانە استانا قالالارىندا (قازاقستان اۋماعىندا ەكسترەميستىك ۇيىم دەپ تانىلعان) دۆك پارتياسىنىڭ ميتينگىلەرى وتۋدە. ميتينگكە جينالعان ازاماتتار ساياسي تۇتقىنداردى بوساتۋدى تالاپ ەتۋدە.

“The Qazaq Times”