Jer betine şığudan bas tartqan kenşiler. Foto: Levıy Front

Senat deputatı Dariğa Nazarbeeva Qarağandı oblısındağı kenşilerdiñ jağdayına qatıstı pikir bildirdi.

"Memleket basşısı elde ne bolıp jatqanın biledi. Qarağandı oblısındağı jağdaydı baqılap otırğanına senimdimin... "ArselorMittal Temirtau" äkimşiligi şielenisti osınday jağdayğa deyin jetkizgeni ökinişti. Şahterlerdiñ jalaqı mäselesi jaña dünie emes, olardıñ talabı ünemi boldı", - dep jauap berdi Nazarbaeva Senat otırısınan keyin jurnalisterdiñ swrağına.

"Şahterlerdiñ qanday talap qoyğanı bizge belgili, olar jalaqılarınıñ 100 payızğa köterilgenin qalaydı. Biraq biz bilmeytin kombinatta ekonomikalıq jağday qanday ekenin esepke aluımız kerek. ArselorMittal Temirtau da jalaqını 100 payızğa deyin köteruge ekonomikalıq mümkindigi bar ma, joq pa, onday aqparattı aşıp körsetip otırğan joq. Qanday jağday bolmasın taraptardıñ ımırağa keluin tileymin", -dedi ol.

Nazarbaevanıñ sözinşe, bwl mäsele nazardan tıs qalmaydı. Biraq kompaniyanıñ sotqa şağım tüsiruine qwqığı bar, odan eşkim bas tarta almaydı.

Ayta keteyik, Qarağandı oblısındağı "ArselorMittal Temirtau" şahtalarındağı 600-den asa kenşi jalaqıların köterudi talap etip, üş künnen beri jer betine şığudan bas tartıp otır. Al ATM kompaniyası ökilderi "şahterler jer betine şıqqan jağdayda ğana kelissöz jürgizemiz" degenmen, qazirgi uaqıtta olarğa qatıstı sotqa şağım tüsirgen.

“The Qazaq Times”