Abaydağı apat: 8 şahtanıñ kenşileri narazılıq bildirdi, ministr kompaniya men sottan qayır bolmağanın aytadı

Qarağandı oblısında «ArselorMittal Temirtau» kompaniyasınıñ qaramağına qaraytın 8 şahtanıñ qızmetkerleri jalaqını köterip, eñbek jağdayı men qauipsizdigin jaqsartudı talap etti. Bwl jöninde QazTAG aqparat agenttigi habarladı.

«Qarağandılıq kenşiler ArselorMittal Temirtau kompaiyasınıñ, käsipodaq ökilderi jäne memlekettik organdardıñ qatısuımen ötken kezdesude basşılıqqa birqatar talaptar qoydı. Olardıñ qatarında  jalaqını arttıru, şahtalardı zamanaui jabdıqtarmen jaraqtandıru, sonday-aq kenşilerdiñ qauipsizdigin qamtamasız etu talabı aytıldı. Abay şahtasındağı qayğılı oqiğadan keyin segiz şahtanıñ wjımı qordalanğan mäselelerdi kün tärtibine şığardı», – dep jazdı QazTAG.

Jwma küni Senattağı Ükimet sağatı kezinde tötenşe jağday ministri YUriy Il'in apat bolğan Abay şahtası bügin üyindiden tolığımen tazartılatının habarladı. Osıdan keyin ükimettik komissiya oqiğanıñ sebebin anıqtauğa kirispek. Ministr Il'in kompaniyanıñ öndiristik nısandarında qauipsizdik erejeleri saqtalmaytının, jüyeli mäseleler barın birneşe ret anıqtap, şara qoldanğanın, dese de sottar nısannıñ jwmısın toqtatu turalı ötinişterdi orındamay, tek äkimşilik jaza retinde ayıppwlmen şektelgenin mälimdedi.

«Ministrlik inspektorları tau-ken jwmıstarımen baylanıstı qauipsizdik erejeleriniñ jüyeli türde bwzılatının, kömir qabatın aldın ala gazdan tazartu, keybir bölikte metan koncentraciyasın avtomattı türde anıqtau jüyesiniñ joqtığı siyaqtı jayttardı twraqtı türde anıqtap keledi. Tekseruden keyin sot organdarına kömir şahtalarınıñ qauipti aymaqtarında jwmıstı toqtatu boyınşa şağım jiberildi. Alayda is jüzinde sot qauipti aymaqtarda jwmıstı toqtatu turalı ötinişti maqwldamaydı, tek äkimşilik ayıppwl saladı» dedi YUriy Il'in bügingi Senat jiınında.

Ötken jeksenbide, qaraşanıñ 7-si Qarağandı oblısındağı Abay şahtasında apat boldı, saldarınan altı adam qaza tauıp, tağı eki adam jaraqat aldı. 56 adam şahtadan öz betinşe şığıp, bas sauğalap ülgergen. Tötenşe jağday ministrligi bwl oqiğanı «metan gazınıñ jarıluımen» tüsindirdi.

Apta basında oblıs äkimi Jeñis Qasımbek öñirdegi barlıq önerkäsiptik käsiporındarın eñbek qauipsizdigi twrğısınan tekserudi tapsırdı. Al policiya Qılmıstıq kodekstiñ 277-babı, yağni «Tau-ken jäne qwrılıs jwmıstarınıñ erejelerin bwzu boyınşa» sotqa deyingi tergeu jürgize bastadı.

Qarağandı şahtalarınıñ bir böligine ielik etetin «ArselorMittal Temirtau» tanımal oligarh Lakşmi Mittalğa tiesili kompaniya. Kompaniya qorşağan ortağa ziyan keltirgeni üşin köp sınaladı, jwmısşıları normağa keliñkiremeytin eñbek jağdayınıñ naşarlığına jii narazılıq bildiredi.

Qazaqstan şahtalarında keyingi şirek ğasırda onnan asa iri apat bolıp, 150-den asa kenşi qaza tapqan. Sonıñ biri, 2008 jılı däl osı şahtada metan gazı jarılıp, 30 adam opat bolıp, tağı 14-i türli därejede jaralanğan edi.

The Qazaq Times