Körneki suret. Foto: «Vostoçnıy variant»

Jekenbi küni, qaraşanıñ 7-si tañğı sağat 8.00 şamasında Qarağandı oblısı Abay qalasında «ArselorMittal Temirtau» kompaniyasına qarastı şahtada gaz jarılıp, apattan altı adam qaza tauıp, eki adamnıñ jaralanğanı habarlandı. Bwl jöninde Tötenşe jağdaylar ministrliginiñ resmi ökili Talğat Uäli mälimdedi.

«7 qaraşa küni sağat 08.37-de Abay qalasındağı «ArselorMittal Temirtau» AQ Abay şahtasında Ştrek 3-K10 jeldetkişiniñ tübinde kenetten metan gazı şığıp, apat boldı. Şahtada barlığı 64 jwmısşı boldı. 56 adam birden öz betinşe evakuaciyalanğan», – dep habarladı ministrlik ökili.

Resmi aqaparatqa qarağanda, oqiğa ornınan şığıp ülgermegen 8 qızmetkerdiñ altauı qaytıs boldı, ekeui jaraqat aldı. Jaralanğan kenşiler oblıstağı H.J.Maqajanov atındağı köpbeyindi auruhanağa jetkizilgen. Olar qazir reanimaciyada jatır.

«Qazir olardı şahtadan şığarıp alu jwmıstarı jürgizilip jatır. Öndiris procesi toqtadı. Apat saldarın joyu üşin arnaulı 20-dan asa qızmetker, 4 tehnika jwmıldırıldı. Prem'er-ministr Asqar Maminniñ tapsırması boyınşa oqiğa ornına tötenşe jağdaylar ministri YUriy Il'in bastağan komissiya qwrıldı», – delingen vedomstvo baspasöz qızmeti taratqan habarlamada.

Qarağandı oblısınıñ äkimi Jeñis Qasımbekov Facebook jelisindeni paraqşasında marqwmdar men zardap şekkenderdiñ otbasına köñil aytıp, tiisti kömek beriletinin jazdı. Aqorda prezident Toqaevtıñ köñil bildiretinin, ükimettik komissiya jasaqtalğanın habarladı.

Oblıstıq Tötenşe jağdaylar departamentiniñ bastığı Mwrat Katpanov apat belgileri tehnogendik sipatta ekenin ayttı. Onıñ sözinşe, «metan gazınıñ ülken koncentraciyası payda bolıp, otteginiñ jetispegendikten kenşiler twnşığıp qaytıs boluı ıqtimal». Äzirge apattıñ naqtı sebebi anıqtalıp jatır.

Qazaqstan şahtalarında keyingi şirek ğasırda onnan asa iri apat bolıp, 150-den asa kenşi qaza tapqan. Sonıñ biri, 2008 jılı däl osı şahtada metan gazı jarılıp, 30 adam opat bolıp, tağı 14-i türli därejede jaralanğan edi.

Aqparat tolıqtırıldı

The Qazaq Times