Foto: Tengrinews

Wlttıq banktiñ bwrınğı törağası, qazirgi "Astana" Halıqaralıq qarjı ortalığınıñ basşısı Qayrat Kelimbetov Birıñğay jinaqtauşı zeynetaqı qorınıñ direktorlar keñesiniñ qwramına kirdi. Bwl turalı abctv.kz saytı habarlap otır.

"BJZQ saytında kütpegen jerden direktorlar keñesiniñ jaña qwramınıñ tizimi şıqtı. Keñes qwramınıñ özgergeni turalı bwğan deyin habarlanbağan. Qwramnıñ ne sebepten özgergeni de belgisiz", - delingen sayt habarlamasında.

Sonday-aq, Kelimbetovten bölek zeynetaqı qorı direktorlar keñesiniñ jañartılğan tizimine Wlttıq bank törağasınıñ orınbasarı Dina Ğalieva, Densaulıq ministrliginiñ äleumettik saqtandıru jäne äleumettik qamsızdandıru departamentiniñ direktorı Mayraş Kozjanova, täuelsiz direktor  Bisenğali Tädjiyaqov, täuelsiz direktor Qadırjan Damitov, Global Sovereign Advisors kompaniyasınıñ basqaruşı seriktesi  Boris Borozan jäne "BJZQ" AQ basqarma törağası Nwrbübi Naurızbaeva kirgen.

Sayttıñ aqparatına süyensek, qordıñ direktorlar keñesinen "ATFBank" AQ basqarma törağası Entoni Espina şıqqan. Bwdan bwrın Qayrat Kelimbetov BJZQ aktivterin basqaru keñesiniñ qwramında bolğan. Äzirge qwramnıñ ne üşin özgergeni jäne Kelimbetov "Astana" HQO basşısı lauazımımen qor qwramında bola ma ol jağı belgisiz.

Ayta keteyik, Wlttıq bank törağası Daniyar Aqışev Äzerbayjan halıqaralıq bankine investiciyalanğan 71,3 mld teñgege qatıstı jağdaydı tüsindiru kezinde  "bwl qarjını problemalı bankke Wlttıq banktiñ bwrınğı qızmetkerleri investiciyalağan" degen edi.

"2014 jıldıñ qazan ayındağı şeşim boyınşa BJZQ zeynetaqı aktivterine Äzerbayjan halıqaralıq bankiniñ wzaq merzimdi qwndı qağazdarı 250 mln dollarğa satıp alınğan. Qwndı qağazdardıñ aynalımda jüru merzimi 8,25 jıldıq payızben 10 jıldı qwraydı. Qağazdar jabıq türde arnayı ofşorlı kompaniya arqılı ornalasıtırlğan, zeynetaqı qarjısın jalğız investiciyalauşı Wlttıq bank. Obligaciyalardı satıp alu turalı şeşimdi BJZQ qızmetkerleri emes, sol kezde Wlttıq bankte jwmıs istegender qabıldağan", - dep pikir bildirgen bolatın Aqışev.

“The Qazaq Times”