فوتو: Tengrinews

ۇلتتىق بانكتىڭ بۇرىنعى توراعاسى، قازىرگى "استانا" حالىقارالىق قارجى ورتالىعىنىڭ باسشىسى قايرات كەلىمبەتوۆ بىرىڭعاي جيناقتاۋشى زەينەتاقى قورىنىڭ ديرەكتورلار كەڭەسىنىڭ قۇرامىنا كىردى. بۇل تۋرالى abctv.kz سايتى حابارلاپ وتىر.

"بجزق سايتىندا كۇتپەگەن جەردەن ديرەكتورلار كەڭەسىنىڭ جاڭا قۇرامىنىڭ ءتىزىمى شىقتى. كەڭەس قۇرامىنىڭ وزگەرگەنى تۋرالى بۇعان دەيىن حابارلانباعان. قۇرامنىڭ نە سەبەپتەن وزگەرگەنى دە بەلگىسىز", - دەلىنگەن سايت حابارلاماسىندا.

سونداي-اق، كەلىمبەتوۆتەن بولەك زەينەتاقى قورى ديرەكتورلار كەڭەسىنىڭ جاڭارتىلعان تىزىمىنە ۇلتتىق بانك توراعاسىنىڭ ورىنباسارى دينا عاليەۆا، دەنساۋلىق مينيسترلىگىنىڭ الەۋمەتتىك ساقتاندىرۋ جانە الەۋمەتتىك قامسىزداندىرۋ دەپارتامەنتىنىڭ ديرەكتورى مايراش كوزجانوۆا، تاۋەلسىز ديرەكتور  بيسەنعالي تادجياقوۆ، تاۋەلسىز ديرەكتور قادىرجان داميتوۆ، Global Sovereign Advisors كومپانياسىنىڭ باسقارۋشى سەرىكتەسى  بوريس بوروزان جانە "بجزق" اق باسقارما توراعاسى ءنۇربۇبى ناۋرىزباەۆا كىرگەن.

سايتتىڭ اقپاراتىنا سۇيەنسەك، قوردىڭ ديرەكتورلار كەڭەسىنەن "اتفبانك" اق باسقارما توراعاسى ەنتوني ەسپينا شىققان. بۇدان بۇرىن قايرات كەلىمبەتوۆ بجزق اكتيۆتەرىن باسقارۋ كەڭەسىنىڭ قۇرامىندا بولعان. ازىرگە قۇرامنىڭ نە ءۇشىن وزگەرگەنى جانە كەلىمبەتوۆ "استانا" حقو باسشىسى لاۋازىمىمەن قور قۇرامىندا بولا ما ول جاعى بەلگىسىز.

ايتا كەتەيىك، ۇلتتىق بانك توراعاسى دانيار اقىشەۆ ازەربايجان حالىقارالىق بانكىنە ينۆەستيتسيالانعان 71,3 ملد تەڭگەگە قاتىستى جاعدايدى ءتۇسىندىرۋ كەزىندە  "بۇل قارجىنى پروبلەمالى بانككە ۇلتتىق بانكتىڭ بۇرىنعى قىزمەتكەرلەرى ينۆەستيتسيالاعان" دەگەن ەدى.

"2014 جىلدىڭ قازان ايىنداعى شەشىم بويىنشا بجزق زەينەتاقى اكتيۆتەرىنە ازەربايجان حالىقارالىق بانكىنىڭ ۇزاق مەرزىمدى قۇندى قاعازدارى 250 ملن دوللارعا ساتىپ الىنعان. قۇندى قاعازداردىڭ اينالىمدا ءجۇرۋ مەرزىمى 8,25 جىلدىق پايىزبەن 10 جىلدى قۇرايدى. قاعازدار جابىق تۇردە ارنايى وفشورلى كومپانيا ارقىلى ورنالاسىتىرلعان، زەينەتاقى قارجىسىن جالعىز ينۆەستيتسيالاۋشى ۇلتتىق بانك. وبليگاتسيالاردى ساتىپ الۋ تۋرالى شەشىمدى بجزق قىزمەتكەرلەرى ەمەس، سول كەزدە ۇلتتىق بانكتە جۇمىس ىستەگەندەر قابىلداعان", - دەپ پىكىر بىلدىرگەن بولاتىن اقىشەۆ.

“The Qazaq Times”