Wlttıq Wlan sardarları. Foto: inform.kz

Qazaqstan Respublikası Qarulı Küşteriniñ qwrılğanına 25 jıl, Wlttıq wlan äskeriniñ qwrılğanına 25 jıl toluına jäne Qazaqstan Respublikasınıñ Memlekettik  rämizder künine oray 2017 jılğı 02 mausım küni sağat 15.00-de Almatı qalasındağı Arbat ortalığında Almalı audandıq äkimdiginiñ qoldauımen Qazaqstan Respublikası Wlttıq wlanınıñ «General» attı koncerttik tobımen (toptıñ körkemdik jetekşisi zapastağı mayor Elena Evstratenko) «Oficer bolu –  nağız erlerdiñ isi» atauımen koncerttik bağdarlaması ötetin boladı.

Wlı Jeñis küni qarsañında Qazaqstan Respublikası Wlttıq wlanınıñ Bas qolbasşısı general-leytenant Ruslan Jaqsılıqovtıñ bastamasımen öñirlerde «Oficer bolu –  nağız erlerdiñ isi!» attı äskeri-patriottıq akciya bastau alğan bolatın. Akciya barısında wlandıqtar qala men öñirlerdegi mektep oquşılarına Wlttıq wlannıñ qaru-jaraqtarı men materialdıq-bazaların tanıstırıp, Wlttıq wlan äskeriniñ tınıs-tirşiligi jaylı äñgimeler örbitip, Wlttıq wlannıñ Joğarı äskeri institutına tüsuge ügit-nasihat jwmıstarın jürgizgen bolatın.

Akciya bastamasına oray, ötkizilgeli otırğan is-şaranıñ negizgi maqsatı öskeleñ wrpaqtıñ boyında Otanğa degen patriottıq sezimdi oyatu, eline qaltqısız qızmet etu, Qazaqstan Respublikası Memlekettik rämizderin süyu men qwrmetteuge tärbieleu, Wlttıq wlan äskeri turalı mağlwmat beru, olardı, Wlttıq wlannıñ Joğarı äskeri institutına tüsuge nasihattau bolıp tabıladı.

Äsker tekteriniñ damuınıñ negizin kadrlıq oficerler qwraydı. Bilikti oficer kadrlardı dayındau maqsatında Qazaqstan Respublikası Ükimetiniñ 1997 jılğı Qaulısımen Petropavl qalasında Wlttıq wlannıñ Joğarı äskeri institutı qwrılğan bolatın. Qwrılğan küninen bastap atalğan oqu ornı 3000 asa kadrlıq oficer mamandarın dayarlap şığardı. Qazirgi tañda olar Qazaqstan Respublikası Wlttıq wlanınıñ, Wlttıq Qauipsizdik komitetiniñ Şekara äskerleriniñ jäne Qorğanıs ministrliginiñ äskeri bölimderinde elimizdiñ qorğanısın küşeytu salasında jemisti eñbek etip jür.

Öziniñ qwrılğan küninen bastap Wlttıq wlannıñ Äskeri institutı qwqıq qorğau äskeriniñ joğarı bilimdi, äri bilikti mamandarın dayarlaytın birden-bir Joğarğı äskeri oqu ornı bolıp tabıladı.

Qazaqstan Respublikasınıñ Memlekettik rämizder künine oray is-şaranıñ şımıldığı Wlttıq wlan orkestriniñ Qazaqstan Respublikasınıñ Memlekettik Gimnin orındaumen aşıladı jäne Wlttıq wlannıñ Tu wstauşı tobı alañğa Qazaqstan Respublikasınıñ Memlekettik Tuın saltanattı türde şığaratın boladı.

İs-şara barısında jiılğan qauımğa memlekettik rämizder künine oray fleşmob jäne äskeri qızmetşilerdiñ qoyan-qoltıq wrıs täsilderinen körsetilimder boladı. Sonımen qatar Wlttıq wlannıñ «General» tobı jäne Wlttıq wlan orkestriniñ orındauında Wlı Otan soğısı jıldarındağı äskeri ändermen qatar patriottıq ruhtağı änder de orındalatın boladı.

İs-şarağa Almatı qalası Almalı audanı äkimdiginiñ ökilderi, Wlttıq wlan «Oñtüstik» öñirlik qolbasşılığınıñ äskeri qızmetşileri, äsker ardagerleri, «Arıstan» mamandandırılğan liceyiniñ, B. Momışwlı atındağı respublikalıq mektep-internatınıñ, qala mektepteri men liceyleriniñ oquşıları jäne qoğamdıq wyımdardıñ ökilderi, qala twrğındarı qatısatın boladı.

qazaqtimes.com