Almatıda jaña zamanaui kitaphana aşıldı

Almatı şaharanıñ oñtüstik ortalığında memlekettik kitaphana aşıldı. Qaladağı 29-şı nısan zamanaui-kouorkiñ formatında qızmet körsetedi. El studentteriniñ üşten biri şoğırlanğan qala, yağni 200 mıñnan asa studenti bar Almatı üşin kitaphana mañızdı mäsele. Kitapsüyer qauım men oqırman jastardıñ şığarmaşılıq ortasına aynaladı dep ümittenemiz.

Bügin Almatı qalasında Qazaqstan Respublikasınıñ Täuelsizdik künine oray jaña äri zamanaui kitaphananıñ saltanattı aşılu räsimi ötti. Mañızdı mädeni oqiğağa qoğam qayratkeri Ahmetjan Aşiri, ädebiettanuşı Qanseyit Äbdezwlı, Qazaq radiosınıñ ünjarğı diktorı jäne ardageri Sauıq Jaqanova, Säule Dosjan, Beybit Sarıbay, Mwrathan Şoqan sındı birqatar qalamgerler, qoğam jäne memleket qayratkerleri, ğılım men mädeniet ökilderi, äkimdikten jauaptı qızmetkerler qatıstı.

Şara barısında qonaqtar üşin arnayı ekskursiya wyımdastırılıp, jaña kitaphananıñ mümkindikteri men infraqwrılımı tanıstırıldı. Kitaphana dästürli kitap mädenieti men zamanaui cifrlıq tehnologiyalardı wştastıra otırıp, qala twrğındarına arnalğan köpfunkcionaldı mädeni äri bilim beru alañı retinde jobalanğan. Mwnda keluşilerdiñ jaylı äri tiimdi uaqıt ötkizuine barlıq jağday jasalğan.

Atap aytqanda, erekşe qajettilikteri bar azamattar üşin arnayı beyimdelgen jwmıs orındarı qarastırılğan. Köru qabileti tömen oqırmandarğa arnalğan iri qariptegi jäne arnayı formattağı ädebietter qorı jinaqtalğan. Sonımen qatar zamanaui komp'yuterlik zal, jeke jwmıs isteuge arnalğan tınış oqu aymaqtarı, toptıq kezdesuler men şığarmaşılıq jobalarğa arnalğan keñistikter jabdıqtalğan. Kitaphananıñ bay kitap qorı men damığan materialdıq-tehnikalıq bazası ärtürli jastağı jäne qızığuşılığı san aluan oqırmandardıñ swranısın qanağattandıruğa bağıttalğan.

Saltanattı jiında ädebiettanuşı, Qazaqstannıñ eñbek siñirgen qayratkeri Qanseyit Äbdezwlı da öz pikirin bildirip, kitaphananıñ tärbielik jäne mädeni mañızına toqtaldı:

«Kitaphana – bolaşaq oqırmandı tärbieleytin mañızdı mädeni orta. Mwnday zamanaui äri tolıq qoljetimdi keñistiktiñ aşıluı jastardı kitapqa jaqındatıp, oqırman mädenietin jaña deñgeyge köteredi», – dedi ädebietşi Qanseyit Äbdezwlı.

Jaña kitaphana barlıq keluşiler üşin, sonıñ işinde mümkindigi şekteuli jandar üşin de tolıq qoljetimdi orta qalıptastırıp, inklyuzivti qoğam qwruğa bağıttalğan mañızdı qadam bolıp otır. Bwl jer aldağı uaqıtta kitap pen şığarmaşılıqtı qadirleytin, bilim men ruhani damuğa wmtılatın qala twrğındarınıñ basın qosatın tanımal mädeni ortalıqqa aynalmaq.

Kitaphananıñ aşıluına kelgen köpşilik. Foto: OKJ bölimşesi

«Kitaphana – qalanıñ ruhani tınısın ayqındaytın orın. Biz öz tarapımızdan qala twrğındarına jaña bilim närin susındauğa, jan-jaqtı damuına jağday jasap otırmız. Bwl kitaphana – tek kitap oqitın orın ğana emes, oy men ideya toğısatın zamanaui mädeni ortalıq», – dedi äkim orınbasarı Abzal Nükenwlı.

Kitaphananıñ erekşe jobalarınıñ biri – balalar men jasöspirimderdiñ kitap oquğa degen qızığuşılığın arttıruğa bağıttalğan «Oqı – oyna!» jobası. Osı joba ayasında balalar aymağında PlayStation 5 ornatılıp, oyın men oqudı üylestiretin jaña format wsınılğan. Bwl bastama balalardı kitaphana keñistigine tartuğa jäne olardıñ oqu mädenietin erte jastan qalıptastıruğa mümkindik beredi.

Bwl bastama Almatı qalasınıñ mädeni infraqwrılımın damıtuğa, oqırman mädenietin jañğırtuğa jäne wlttıñ ruhani qwndılıqtarın nığaytuğa bağıttalğan mañızdı qadam retinde bağalanadı.

Rozıbakiev köşesi 247-üy, 7-şi ğimaratta ornalasqan jäne qala twrğındarı men qonaqtarı üşin kündelikti 08:30-20:00 uaqıt aralığında demalıssız jwmıs isteydi.

Bügingi tañda jaña tolıqqan kitaphananı qosa alğanda, Almatı qalasında 38 kitaphana jwmıs isteydi, olardıñ 29-ı – Almatı Kitaphanalarınıñ bölimşeleri, al 9-ı – respublikalıq kitaphana. Sonımen qatar, 35 joğarı oqu ornınıñ ärqaysında kitaphana bar.

Qala boyınşa üş kitaphana täulik boyı (24/7 rejiminde) jwmıs isteydi: Alatau Creative Hub ortalığı, Mwhtar Äuezov atındağı kitaphana jäne Jambıl atındağı qalalıq jasöspirimder kitaphanası.

The Qazaq Times