AQŞ-ta Jo Baydenniñ inauguraciyasına eki kün qaldı. Bwdan bwrın Kapitoliydi basıp alu jäne bülikter kezinde birneşe adamnıñ qaza tabuı Uaşington jwrtşılığın alañdatıp otır. Sondıqtan da Qwrama Ştattıñ wlttıq wlan küşteri jer-jerdegi jasaqtarın ortalıq qalağa attandıruda.

AQŞ prezident Donal'd Tramptıñ mañındağı aqparat közderine silteme jasağan amerikalıq basılımdar Jozef Baydenniñ inauguraciyasınan bwrın Tramp bas qaladan şığıp ketedi degen mälimetter tarattı. Bayden särsenbi küni AQŞ prezidenti retinde ant berip qızmetine kirispek. Baydenniñ ant beru räsimine qatıspaytının Tramp bwğan deyin de aytqan bolatın.

Uaşington wlttıq wlan sarbazdarına toldı. Foto: EPA.

Federaldıq Qauipsizdik qızmeti 16-20 qañtar arasında barlıq ştattardıñ ortalıq qalalarında radikaldı toptardıñ dürbeleñi boluı mümkin dep eskertu jasadı. Amerikalıq basılımdardıñ jazuınşa, keybir qalalardağı ükimet ğimarattarı esik-terezelerin temir torlarmen qorşauğa kirisken. Birqatar aymaqtarda toptalıp miting wyımdastıruğa rwqsat berilmegen jağdaylar da boldı. Soğan qaramastan, Tramp jaqtastarı birneşe qalada narazılıq şerulerine şıqtı. Biraq, qaqtığıs bolğan joq.

Ogayo ştatındağı Kongress ğimaratınıñ aldına jinalğan narazı top özderiniñ qaru alıp jüru qwqığın qorğau üşin jinalğandarın aytqan. Boogaloo atalğan qozğalıstıñ keybir müşeleri osığan deyin biliktiñ Jo Baydenge ötkerilip beruine qwraldıq qarsılıq körsetuge şaqırğanı bar. Al, özge de qwraldı toptardıñ narazılığı Tehas, Oregon jäne Miçigan ştattarında ötken bolatın.

AQŞ zañı eldiñ ortalıq qalasında qwral alıp jüruge tıyım saladı. ABC habarında Uaşington policiyası Kapitoliy mañınan 25 jastağı azamattı qwralımen qolğa tüsirgenin habarladı. Policiyanıñ keybir şekteulerine jäne qauipsizdikke qarsı türli şaralarına qaramastan AQŞ-tıñ birqatar ştattarında Tramptıñ bilikten ketuine narazılar qwraldı qarsılıq körsetuge dayın ekenin bildirgen.

“The Qazaq Times”