فوتو: sharij.net

تۇركيا پرەزيدەنتى رەجەپ تايىپ ەردوعان قىرعىزستان استاناسى بىشكەكتە وتكەن بيزنەس-فورۋمدا حالىقارالىق ساۋداداعى دوللاردىڭ ۇستەمدىگىنە نۇكتە قويۋعا شاقىردى. بۇل تۋرالى انادولى اگەنتتىگى حابارلايدى.

تۇرىك باسشىسىنىڭ سوزىنشە، امەريكالىق دوللارمەن ساۋدا جاساۋ حالىقارالىق ساۋدانىڭ ۇلكەن پروبلەماسى بولىپ تابىلادى. «ۇلتتىق ۆاليۋتالارمەن ەسەپتەۋدى قولعا الۋ ارقىلى حالىقارالىق ساۋداداعى دوللار ۇستەمدىگىن اياقتاۋىمىز كەرەك» ، - دەگەن ول. نەگىزىندە، تامىز ايىنداعى دوللار وسىمىنەن كەيىن انكارا بيلىگى ۇلتتىق ۆاليۋتانى نىعايتۋ ءۇشىن شەتەلدىك ۆاليۋتاداعى دەپوزيتتەرگە سالىناتىن سالىق كولەمىن ارتتىرىپ، ليرامەن ساقتالعان جيناقتى تومەندەتكەن ەدى.

وسىعان وراي، «ەگەر ولاردا دوللار بار بولسا، بىزدە ءبىزدىڭ ادامدارىمىز بار» دەپ مالىمدەگەن تۇرىك باسشىسى حالقىن دوللار مەن ەۋرولارىن ۇلتتىق ۆاليۋتاعا اۋىستىرۋعا شاقىرعان بولاتىن.

بارىمىزگە بەلگىلى، 1 تامىزدا اقش امەريكالىق ديپلوماتتاردىڭ، سونىڭ ىشىندە پاستور ەندريۋ برانسوننىڭ قاماۋعا الىنۋىنا بايلانىستى تۇركيانىڭ سىرتقى ىستەر ءمينيسترى مەن ادىلەت مينيسترىنە قارسى سانكتسيا سالعان ەدى. ە.برانسون 2016 جىلدىڭ قازان ايىنان بەرى قاماۋدا. وعان فەتۋللاھ گۇلەن قوزعالىسىنا قولداۋ كورسەتەدى ءارى بيلىكتى كەتىرۋگە باعىتتالعان تىڭشىلىق پەن وزگە دە ارەكەتتەرگە قاتىسى بار دەگەن كىنا تاعىلعان. ال، اقش بيلىگى برانسوننىڭ قانداي دا ءبىر قىلمىسىنا دالەل جوق، سوندىقتان ول تۇركيا بيلىگى تاراپىنان ادىلەتسىزدىكتىڭ قۇربانى بولۋدا دەپ سانايدى. ال، تۇركيا ءوز كەزەگىندە اقش-تىڭ وسى ارەكەتىنە جاۋاپ رەتىندە امەريكالىق مينيسترلەردىڭ (سىرتقى ىستەر ءمينيسترى مەن ادىلەت ءمينيسترى) اكتيۆتەرىن بۇعاتتاپ تاستادى.

“The Qazaq Times”