فوتو: Kursiv.kz

وسى جىلدىڭ ماۋسىم ايىنداعى ناتيجە بويىنشا انتيبيوتيكاتەر باعاسى ايتارلىقتاي قىمباتتاعان. امپيتسيللين جىلىنا 25,2%-عا قىمباتتاسا، انتيسەپتيكالىق قۇرالدار باعاسى 10,6%-عا، ۆيتامين پرەپاراتتارى 3,4%-عا، مەديتسينالىق داكە 9,3%-عا، ماقتا باعاسى 2%-عا جوعارىلاعان. مۇنداي مالىمەتتى energyprom.kz اگەنتتىگى كەلتىرىپ وتىر. 

Atameken Business Channel سايتىنىڭ مالىمەتىنشە، قازاقستاندا باعاسى 5-10 دوللاردان اسپايتىن دارىلەر ءجيى ساتىلادى. ولاردىڭ كوممەرتسياداعى ۇلەسى 22%-دى قۇرايدى. سونداي-اق باعاسى ءبىر دوللاردان اسپايتىن دارىلەردىڭ نارىقتاعى ۇلەسى 2015 جىلى 9%-عا، 2016 جىلى 14%-عا ارتقان. ياعني قازاقستاندىقتار قىمبات دارىلەردەن گورى قولجەتىمدى باعاداعى دارىلەردى قولدانا باستاعان.

ساراپتاما اگەنتتىگىنىڭ مالىمەتىنشە، قازاقستاندا فارماتسيا نارىعى بەلسەندى دامىپ كەلەدى. مىسالى وسى جىلدىڭ قاڭتار-مامىر ايلارىندا نەگىزگى فارماتسەۆتيكالىق ونىمدەردىڭ شىعارىلىمى باعا ەسەبى بويىنشا 32,68 ملرد تەڭگەنى قۇراعان جانە كورسەتكىش وتكەن جىلمەن سالىستىرعاندا ەكى ەسەگە جوعارى.

ال ءدارى-دارمەك ءوندىرىسى بويىنشا الماتى وبلىسى 4,77 توننا كورسەتكىشپەن الدىڭعى ورىندا تۇر. ەكىنشى ورىندا الماتى - 1,5 توننا ءدارى ءوندىرىپ، ءبىر جىلدا  وندىرىس 53,4%-عا ارتقان. وڭتۇستىك قازاقستان وبلىسى 1,07 مىڭ توننامەن ءۇشىنشى ورىندا تۇر.

دەگەنمەن يمپورت كولەمى دە ازايماعان. وسى جىلدىڭ 4 ايىندا يمپورتتالاتىن مەديكامەنتتەر كولەمى 1,5 ەسەگە كوبەيگەن. ال ەكسپورت كولەمى 19,3% شاماسىندا.

ايتا كەتەيىك، كەشە قر دەنساۋلىق ساقتاۋ ءمينيستتىر ەلجان ءبىرتانوۆ ۇكىمەت وتىرىسىندا دارىلەردىڭ شەكتىك باعاسى بەلگىلەنەتىنىن ايتقان. ونىڭ سوزىنشە، قازاقستاندا باعا بەلگىلەۋدىڭ باقىلانبايتىن جۇيەسى، ءبىرىنشى كەزەكتە، وندىرۋشىلەردىڭ  وز دارىلەرىنىڭ كەز كەلگەن باعاسىن بەلگىلەۋ قۇقىعىنا يە بولۋىنان باستالادى. ءدارى باعالارىنىڭ ءارتۇرلى بولۋىنا دا وسى سەبەپ. مىسالى ءبىر قالاداعى ءدارىحانالار اراسىندا باعالاردىڭ ايىرماشىلىعى 20 پايىزعا جەتسە، نارىقتا پرەپارات تاپشىلىعى تۋىنداعان جاعدايدا ۇستەمە باعا 200 پايىزعا دەيىن دە ءوسىپ كەتۋى مۇمكىن. ەندى جاقىن ۋاقىتتا دارىلەردىڭ شەكتى باعالارىن بەلگىلەۋ بۇل جاعدايدى وزگەرتۋى مۇمكىن.

“The Qazaq Times”