بايدەن كليمات سامميتىنە قاتىسپاعان رەسەي مەن قىتاي باسشىلارىن سىنعا الدى

كليمات ءسامميتى اياسىندا اقش پرەزيدەنتى جو بايدەن بىرقاتار ناقتى شارالار قابىلداۋعا ۋادە ەتتى. سونداي-اق، كليمات ماسەلەسىنىڭ اسا ماڭىزدى ەكەنىن ايتا وتىرىپ، الەمدىك ورتاق ماسەلەنىڭ تالقىسىنا قاتىسپاعان قىتاي مەن رەسەي باسشىلارىن سىنعا الدى.

سەيسەنبىدەگى مالىمدەمەسىندە پرەزيدەنت بايدەن سامميتكە قاتىسقان وزگە ەلدەرمەن 2030 جىلعا دەيىن ورمان كەسۋدى توقتاتۋ جانە 200 ميلليون گەكتار ورماندى، باسقا دا ەكوجۇيەلەردى قالپىنا كەلتىرۋ تۋرالى تاريحي كەلىسىمگە قول قوياتىنىن حابارلادى. بايدەن سونىمەن قاتار مەتان شىعارىندىلارىن ازايتۋ ءۇشىن اقش ۇكىمەتىنىڭ ەنەرگەتيكا، اۋىل شارۋاشىلىعى، كولىك، تۇرعىن ءۇي جانە ىشكى ىستەر دەپارتامەنتتەرىنىڭ ءارتۇرلى بولىمدەرىن بىرىكتىرۋ تۋرالى جوسپارىن دا جاريا ەتتى.

عالامدىق ورتاق پروبلەماعا قاتىستى بۇل جينالىستىڭ ماڭىزىن ايرىقشا اتاپ وتكەن اقش پرەزيدەنتى وتىرىسقا قاتىسپاعان قىتايلىق جانە رەسەيلىك ارىپتەستەرىن سىنعا الدى. «مەنىڭ ويىمشا، بۇل قىتاي ءۇشىن ۇلكەن قاتەلىك. شىنىن ايتقاندا، الەم قىتايعا قاراپ «ولار وسىنداي حالىقارالىق ماسەلەدە قانداي قوسىمشا باستاما كوتەرەدى» دەپ كۇتتى. قىتايدىڭ بۇل جەردە بولماۋى الەمگە اسەر ەتۋ جوعالتتى. مەنشە بۇل رەسەيگە دە قاتىستى»، – دەدى بايدەن سوزىندە.

رەسەي پرەزيدەنتى ۆلاديمير پۋتين مەن قىتاي باسشىسى شي جينپيڭ اتالعان سامميتكە قاتىسپاعانىمەن كەلىسسوزدەر ءۇشىن وزدەرىنىڭ دەلەگاتسيالارىن گلازگوعا جىبەرگەن. قىتاي ءوندىرىس بارىسىندا كومىر قىشقىل تەكتى ەڭ كوپ شىعاراتىن ەل سانالادى، ەكىنشى ورىندا اقش، ارى قاراي ەو، ءۇندىستان، بەسىنشى ورىندا رەسەي تۇرادى.

شوتلانديانىڭ گلازگو قالاسىندا ءوتىپ جاتقان سامميت 14 قاراشاعا دەيىن جالعاسادى، وعان 120 مەملەكەت پەن حالىقارالىق ۇيىم باسشىلارى قاتىسىپ جاتىر. قىتاي مەن رەسەي باسشىلارى بولماسا دا سامميتتە بىرقاتار ماڭىزدى كەلىسىمدەر دە جاسالدى. ايتالىق، 2030 جىلعا دەيىن مەتان گازىنىڭ ءبولىنىسىن ازايتۋ جانە وسى جىلعا دەيىن ورمان كەسۋدى توقتاتۋ سەكىلدى شارالاردى ايتۋعا بولادى.

رەسەي پرەزيدەنتى سەيسەنبىدەگى ۆيرتۋالدى كەزدەسۋدە رەسەيدىڭ «ورمان كەسۋدى باقىلاۋ بويىنشا  قاتاڭ شارالار كورەتىنىن» مالىمدەگەن، سونداي-اق، رەسەي دە 2030 جىلعا دەيىن ورمان كەسۋدى توقتاتۋ كەلىسىمىنە قول قويعان ەل قاتارىندا بار.

The Qazaq Times