فوتو: https://cdn

حالىقارالىق قاۋىمداستىق قىتايداعى وليمپيادا ويىندارىنا ديپلوماتيالىق بويكوت جاريالاۋى كەرەك. بۇل پىكىردى اقش كونگرەسى وكىلدەر پالاتاسىنىڭ سپيكەرى نەنسي پەلوسي (كاليفورنيا شتاتىنىڭ دەموكراتى) زاڭ شىعارۋشىلار جيىنىندا ايتتى.

اقش مەملەكەتتىك يەرارحياسىندا ءۇشىنشى ماڭىزدى لاۋازىمعا يە پەلوسي: «بويكوت اياسىندا الەمنىڭ جەتەكشى ەلدەرىنىڭ باسشىلارى قحر-داعى وليمپيادا ويىندارىنا قاتىسۋدان باس تارتۋى كەرەك. وليمپياداعا بارۋ ارقىلى قىتاي ۇكىمەتىنە قۇرمەت كورسەتۋدىڭ قاجەتى جوق»، – دەدى.

اقش-تاعى قىتاي ەلشىلىگىنىڭ وكىلى ليۋ پەنيۋ پەلوسيدىڭ ۇندەۋىنە جاۋاپ رەتىندە Twitter-دە: «كەيبىر امەريكالىق ساياساتكەرلەردىڭ وليمپيادانى جەلەۋ ەتىپ قىتايدىڭ ىشكى ىسىنە ارالاسۋى ادەتتەگىدەي ساتسىزدىككە ۇشىرايدى جانە حالىقارالىق قوعامداستىق مۇنى قۇپتامايدى. ءبىر قىزىعى، امەريكاداعى كەي ساياساتكەرلەردىڭ مورالدىق بيلىككە يە بولۋىنا نە سەبەپ بولادى؟ ادام قۇقىقتارى ماسەلەلەرىنە كەلەتىن بولساق، ولاردىڭ قىتايعا نەگىزسىز سىن ايتۋى دۇرىس ەمەس. قىسقى وليمپيادا ويىندارىنا كەلەتىن بولساق، ءبىز وليمپيادالىق حارتيا رۋحىنا قايشى كەلەتىن جانە سايىپ كەلگەندە بارلىق سپورتشىلاردىڭ ادال كۇرەسكە دەگەن قۇقىعىنا نۇقسان كەلتىرەتىن سپورتتى ساياساتتاندىرۋىنا قارسىمىز»، – دەدى.

8 ناۋرىزدا قىتاي سىرتقى ىستەر مينيسترلىگىنىڭ رەسمي وكىلى چجاو ليتسزيان «ادام قۇقىقتارىن قورعاۋ ۇرانىمەن ءىرى جارىستاردى وتكىزبەۋ جانە باسقا مەملەكەتتەردىڭ ىشكى ىستەرىنە ارالاسۋعا تىرىساتىن جەكەلەگەن ەلدەر مەن ۇيىمداردىڭ ارەكەتىنە قارسىمىز» دەگەن. XXIV قىسقى وليمپيادا 2022 جىلى 4-20 اقپان ارالىعىندا بەيجىڭدە ءوتۋى ءتيىس. 2015 جىلدىڭ 31 شىلدەسىندە كۋالا-لۋمپۋرداعى حالىقارالىق وليمپيادا كوميتەتىنىڭ سەسسياسىندا دودا وتەتىن ورىن رەتىندە قحر استاناسى تاڭدالدى.

قىسقى ويىندارعا بويكوت جاريالاۋدى كانادا، نورۆەگيا، اقش ساياساتكەرلەرى، سونداي-اق ءار ءتۇرلى ەلدەردەن كەلگەن 200-گە جۋىق ادام قۇقىقتارى جونىندەگى ۇيىمداردىڭ وكىلدەرى ۇسىنعان. وعان قىتايدىڭ شىڭجاڭ-ۇيعىر اۆتونوميالىق اۋدانىنداعى ادام قۇقىقتارىنا قارسى ساياساتى سەبەپ بولىپ وتىر.

كەيىنگى جىلدارى بۇۇ مەن حالىقارالىق زەرتتەۋشىلەر قىتاي شىڭجاڭ ولكەسىندە ميلليوننان اسا ۇيعىر، قازاق، قىرعىز جانە باسقا دا مۇسىلمانداردى لاگەرگە قامادى دەپ مالىمدەگەن. قۇقىق قورعاۋشىلار جۇزدەگەن مىڭ ادامنىڭ ءدىني ءراسىم جاساعانى نەمەسە شەتەلدەگى تانىستارىمەن بايلانىس ورناتقانى ءۇشىن نەگىزسىز تۇرمەگە قامالعانىن ايتقان.

اقش ۇكىمەتى مەن بەلگيا، نيدەرلاندى جانە كانادا پارلامەنتتەرى پەكيندى گەنوتسيد جاساپ وتىر دەپ بىرنەشە رەت ايىپتادى. قىتاي شىڭجاڭداعى ءىس-ارەكەتىن «تەرروريزممەن كۇرەس»، ال لاگەرلەردى «كاسىپكە باۋليتىن ورىن» دەپ اتاعان. بەيجىڭ باتىستى قىتايدىڭ «ىشكى ىسىنە ارالاستى» دەپ سىنايدى.

"The Qazaq Times"