اقش وكىلدەر پالاتاسى شىڭجاڭ تۋرالى زاڭدى باسىم داۋىسپەن قابىلدادى. فوتو: Reuters

اقش كونگرەسىنىڭ وكىلدەر پالاتاسى ءماجبۇرلى ەڭبەكپەن وندىرىلگەن كەز-كەلگەن ءونىمدى اقش نارىعىنا كىرگىزۋگە شەكتەۋ قوياتىن زاڭ جوباسىن قابىلدادى. «ۇيعىرلاردىڭ ءماجبۇرلى ەڭبەگىنە جول بەرمەۋ» دەپ اتالاتىن زاڭ جوباسىنا قوسا شىڭجاڭ ماسەلەسىنە قاتىستى تاعى ەكى قارارعا داۋىس بەرىلگەن، ءۇش قارار دا وكىلدەر پالاتاسىندا باسىم داۋىسپەن قابىلداندى

وكىلدەر پالاتاسىندا 8 جەلتوقساندا قارالعان «ۇيعىرلاردىڭ ءماجبۇرلى ەڭبەگىنە جول بەرمەۋ» تۋرالى HR1155 زاڭ جوباسى 428 داۋىستىڭ ماقۇلداۋىمەن ءبىر داۋىستىڭ قارسىلىعىمەن قابىل الىندى. شىلدەدە وسى زاڭ جوباسى سەناتتاعى ەكى پارتيانىڭ سەناتورلارى جاعىنان دا بىردەن ماقۇلدانعان ەدى.

پالاتا سپيكەرى نەنسي پەلوسي داۋىس بەرۋ الدىنداعى ءباسپاسوز جيىنىنا: «قىتاي حالىق رەسپۋبليكاسى ۇيعىرلار مەن باسقا دا ازشىلىقتاردى باسىپ-جانشۋ ءۇشىن جاپپاي تۇرمەگە قاماۋ، ازاپتاۋ جانە ءماجبۇرلى ەڭبەككە سالۋ سىندى قاتىگەز شارالاردى الىپ بارۋدا. بۇل زاڭ جوبالارى ارقىلى وكىلدەر پالاتاسى وسىنداي جانتۇرشىگەرلىك جاعدايلاردى توقتاتىپ، بەيجىڭنىڭ زۇلىمدىعىن اشكەرەلەۋدى ماقسات ەتەدى»، – دەگەن.

زاڭ جوبالارىندا قىتاي ۇكىمتىن شىڭجاڭداعى از ساندى ۇلتتار تاپ بولىپ وتىرعان ادام قۇقىعى ماسەلەسى بويىنشا قاتاڭ ايىپتايدى. سونداي-اق، حالىقارالىق وليمپيادا كوميتەتىن ادام قۇقىقتارى جونىندەگى مىندەتتەمەلەرىن ورىندامادى دەپ سىنعا العان.

داۋىس بەرۋ كەزىندەگى وتىرىستا رەسپۋبليكاشىلدار پارتياسىنىڭ پالاتا وكىلى كريس سميت (Chris Smith) «بۇل شي ءجينپيڭنىڭ (سي تسزينپين) گەنوتسيدى، ول بۇل بەرىلگەن بۇيرىقتارىنا تىكەلەي جاۋاپتى. تەرگەۋ لاگەرلەرىندە ايەلدەر قورلىق پەن جىنىستىق زورلىق-زومبىلىققا ۇشىرادى. ۇيعىر بالالارىنىڭ دۇنيەگە كەلۋىنە جول بەرمەۋ ءۇشىن ءماجبۇرلى تۇسىك جاساتتى جانە ءمازبۇرلى زارارسىزداندىردى (بالالى بولۋ مۇمكىندىگىنەن ايىرۋ. رەد.QT). بۇل بىرىككەن ۇلتتار ۇيىمىنىڭ «گەنوتسيد قىلمىسىنىڭ الدىن الۋ جانە جازالاۋ تۋرالى» كونۆەنتسياسىنىڭ 2(d) تارماعىن تىكەلەي بۇزعان بولىپ سانالادى»، – دەگەن مالىمدەدى.

رەسمي بەيجىڭ بيلىگى وزىنە تاعىلعان ايىپتاردى جوققا شىعارىپ كەلەدى.

The Qazaq Times