Foto: https://cdn

Halıqaralıq qauımdastıq Qıtaydağı Olimpiada oyındarına diplomatiyalıq boykot jariyalauı kerek. Bwl pikirdi AQŞ Kongresi Ökilder palatasınıñ spikeri Nensi Pelosi (Kaliforniya ştatınıñ demokratı) zañ şığaruşılar jiınında ayttı.

AQŞ Memlekettik ierarhiyasında üşinşi mañızdı lauazımğa ie Pelosi: «Boykot ayasında älemniñ jetekşi elderiniñ basşıları QHR-dağı Olimpiada oyındarına qatısudan bas tartuı kerek. Olimpiadağa baru arqılı Qıtay ükimetine qwrmet körsetudiñ qajeti joq», – dedi.

AQŞ-tağı Qıtay elşiliginiñ ökili Lyu Pen'yu Pelosidiñ ündeuine jauap retinde Twitter-de: «Keybir amerikalıq sayasatkerlerdiñ Olimpiadanı jeleu etip Qıtaydıñ işki isine aralasuı ädettegidey sätsizdikke wşıraydı jäne halıqaralıq qoğamdastıq mwnı qwptamaydı. Bir qızığı, Amerikadağı key sayasatkerlerdiñ moral'dıq bilikke ie boluına ne sebep boladı? Adam qwqıqtarı mäselelerine keletin bolsaq, olardıñ Qıtayğa negizsiz sın aytuı dwrıs emes. Qısqı Olimpiada oyındarına keletin bolsaq, biz olimpiadalıq Hartiya ruhına qayşı keletin jäne sayıp kelgende barlıq sportşılardıñ adal küreske degen qwqığına nwqsan keltiretin sporttı sayasattandıruına qarsımız», – dedi.

8 naurızda Qıtay Sırtqı ister ministrliginiñ resmi ökili Çjao Liczyan «adam qwqıqtarın qorğau wranımen iri jarıstardı ötkizbeu jäne basqa memleketterdiñ işki isterine aralasuğa tırısatın jekelegen elder men wyımdardıñ äreketine qarsımız» degen. XXIV qısqı Olimpiada 2022 jılı 4-20 aqpan aralığında Beyjiñde ötui tiis. 2015 jıldıñ 31 şildesinde Kuala-Lumpurdağı Halıqaralıq Olimpiada komitetiniñ sessiyasında doda ötetin orın retinde QHR astanası tañdaldı.

Qısqı oyındarğa boykot jariyalaudı Kanada, Norvegiya, AQŞ sayasatkerleri, sonday-aq är türli elderden kelgen 200-ge juıq adam qwqıqtarı jönindegi wyımdardıñ ökilderi wsınğan. Oğan Qıtaydıñ Şıñjañ-Wyğır avtonomiyalıq audanındağı adam qwqıqtarına qarsı sayasatı sebep bolıp otır.

Keyingi jıldarı BWW men halıqaralıq zertteuşiler Qıtay Şıñjañ ölkesinde millionnan asa wyğır, qazaq, qırğız jäne basqa da mwsılmandardı lager'ge qamadı dep mälimdegen. Qwqıq qorğauşılar jüzdegen mıñ adamnıñ dini räsim jasağanı nemese şeteldegi tanıstarımen baylanıs ornatqanı üşin negizsiz türmege qamalğanın aytqan.

AQŞ ükimeti men Bel'giya, Niderlandı jäne Kanada parlamentteri Pekindi genocid jasap otır dep birneşe ret ayıptadı. Qıtay Şıñjañdağı is-äreketin «terrorizmmen küres», al lager'lerdi «käsipke baulitın orın» dep atağan. Beyjiñ batıstı Qıtaydıñ «işki isine aralastı» dep sınaydı.

"The Qazaq Times"