فوتو: https://cdn

قازىر اقش ءۇشىن باستى باسەكەلەس – قىتاي. بۇل تۋرالى اقش كونگرەسىنىڭ سەناتى مەن وكىلدەر پالاتاسىنا العاشقى ۇندەۋىندە دجو بايدەن مالىمدەدى.

«ءبىز ءححى عاسىردا جەڭىسكە جەتۋ ءۇشىن قىتايمەن جانە باسقا ەلدەرمەن باسەكەلەستىك جاعدايىندا تۇرمىز. امەريكا كوشباسشى مەملەكەت ەكەنىن دالەلدەۋ كەرەك»، – دەدى بايدەن. سونىمەن بىرگە، اق ءۇي باسشىسى وتانداستارىن قوعامداعى تەرەڭ پولياريزاتسيانى، پارتياارالىق بولىنىستەردى جەڭۋگە شاقىردى.

ناۋرىزدا اقش-تىڭ ۇلتتىق قاۋىپسىزدىك ستراتەگياسىنا بايلانىستى قۇجات جاريالاندى. قۇجاتتا رەسەي «حالىقارالىق ارەناداعى تۇراقسىزداندىرۋشى»، ال قىتاي امەريكا ءۇشىن «قاۋىپتى ءارى جەتەكشى قارسىلاس» رەتىندە كورسەتىلگەن. قاۋىپسىزدىك ستراتەگياسى جاريالانعان سوڭ مەملەكەتتىك دەپارتامەنتتىڭ وكىلى نەد پرايستىڭ مالىمدەمەسىندە: «قىتاي – ءبىزدىڭ نەگىزگى باسەكەلەسىمىز. قىتاي ءبىز ءۇشىن XXI عاسىرداعى باستى گەوساياسي قارسىلاس سانالادى. باسقا مەملەكەتتەرمەن، اسىرەسە رەسەيمەن سالىستىرعاندا قىتايدان تونەتىن قاۋىپ جوعارى. رەسەي ايماقتارداعى ىقپالىن قامتاماسىز ەتۋگە تىرىسادى. الايدا، رەسەي قىتاي سياقتى الەۋەتكە، مۇمكىندىكتەرگە يە ەمەس»، – دەدى.

اقش تاراپى قىتاي مەن رەسەيدەگى ادام قۇقىقتارى ماسەلەسىن ءجيى كوتەرىپ كەلەدى. 17 اقپاندا بايدەن قىتاي بيلىگىنىڭ شىڭجاڭداعى ارەكەتىن ايىپتاپ، ادام قۇقىقتارىن بۇزۋى جاۋاپسىز قالمايتىنىن ەسكەرتكەن. سول كۇنى بايدەن مالىمدەمەسىندە: «مەن ببۇ-دا جانە وزگە دە حالىقارالىق ۇيىمدارمەن ادام قۇقىقتارىن قورعاۋدى جالعاستىرامىن. قازىر قىتاي الەمدىك كوشباسشى بولۋعا تىرىسادى. بۇل اتاققا يە بولۋ ءۇشىن باسقا مەملەكەتتەردىڭ سەنىمىنە يە بولۋى كەرەك. ال قىتاي بيلىگى ادام قۇقىقتارىن ورەسەل بۇزىپ كەلەدى. مۇنىڭ جاۋاپسىز قالمايتىنىن ەسكەرتەمىن. شي جيڭ پيڭ بۇل ارەكەتتىڭ قانداي ناتيجە بەرەتىنىن جاقسى بىلەدى»، – دەدى.

"The Qazaq Times"