اقش پەن قىتاي ليدەرلەرى ورتاسىنداعى ۆيرتۋالدى جۇزدەسۋ اقپارات قۇرالدارىنا بىردەي اشىق بولمادى. ءبىر كۇن بۇرىن سايتىمىزدا كەزدەسۋدەگى نەگىزگى تاقىرىپتار مەن تاراپتاردىڭ ۇستانىمدارى، العا جىلجىتقىسى كەلەتىن مۇددەلەرى تۋرالى ساراپتالعان-دى. كەشەدەن بەرى اشىق اقپارات كوزدەرىنە شىققان دەرەكتەردە تايۋان (تايۆان) تاقىرىبىنىڭ بايدەن-شي سامميتىندەگى ەڭ «اۋىر تاقىرىپ» بولعانى ايتىلىپ جاتىر.

تايۋان تاقىرىبىنا كەلگەندە قىتايدىڭ بارىنشا قاتاڭ پوزيتسيانى ۇستاعىسى كەلەتىنى بەلگىلى. سەبەب، بۇل قىتاي بيلىگىن ۇستاعان كوممۋنيستىك پارتيانىڭ، قازىرگى قىتاي بيلىگىنىڭ حالىقارالىق ارەناداعى جانە ەل ىشىندەگى ابروي بەدەلىنە ساياتىن ماسەلە. ۇزاق جىلداردان بەرى «تايۋاندى بىرىكتىرىپ، وتان تۇتاستىعىن قالپىنا كەلتىرۋ» دەپ ۇرانداتىپ كەلگەن كوممۋنيستىك بيلىك ءۇشىن تايۋاننان ءبىرجولا قول ءۇزىپ قالۋ ۇلكەن ابرويسىزدىققا سوقتىرار ەدى. ءتىپتى، بۇنىڭ سوڭى ەل ىشىندەگى نارازىلىقتىڭ اسقىنۋىنا، بيلىك پارتياسىنا دەگەن سەنىمنىڭ جويىلىپ، اقىر سوڭىندا ميلليارد حالىقتىڭ تولقۋىمەن كوممۋنيستىك بيلىكتىڭ اۋدارىلۋىنا الىپ كەلۋى دە عاجاپ ەمەس.

انە سوندىقتان دا، قىتاي باسشىسى شي جينپيڭ (سي تسزينپين) امەريكالىق ارىپتەسىنە تايۋاننىڭ ەگەمەندىگىن قولداۋ «وتپەن ويناعاۋمەن بىردەي» دەپ ەسكەرتكەن ەكەن. قىتاي اقپارات قۇرالدارى كەزدەسۋدە شي ءجينپيڭنىڭ تايۋان تۋرالى قاتاڭ پىكىرلەرىن باسا بەلگىلەپ جاتىر. ايتالىق، ككپ-نىڭ اعىلشىن تىلىندەگى رەسمي باسلىمى سانالاتىن «گلوبال تايمس» ەكى ەل ورتاسىنداعى سوڭعى ۋاقىتتا شيەلەنىسىپ كەتكەن قايشىلىقتارعا قاتىستى ءشيدىڭ اقش-تى ايىپتاعان پىكىرلەرىن باسا جازدى. وندا قىتاي باسشىسىنىڭ  «تايۋان قايتا-قايتا اقش-قا ارقا سۇيەپ، قۇراما شتاتتار بولسا قىتايدى تەجەۋ ءۇشىن تايۋاندى پايدالاندى» دەگەن ايىپتاۋ سوزدەرى باسا بەرىلگەن ەكەن.

قالاي بولماسىن، بۇل بەيجىڭ بيلىگىنىڭ اتالعان تاقىرىپتاعى قاتاڭ ۇستانىمىن كورسەتكەندەي بولدى. دەگەنمەن، تايۋان ماسەلەسىندە بايدەن دە قۇراما شتاتتاردىڭ ۇستانىمىن اشىق ورتاعا سالعان. اق ءۇيدىڭ رەسمي مالىمدەمەسىندە ايتىلعانداي بايدەن كەزدەسۋدە: «قۇراما شتاتتار تايۋان بۇعازىنداعى قازىرگى جاعدايدى كىم دە كىم ءبىر تاراپتى وزگەرتۋگە نەمەسە تۇراقتىلىق پەن بەيبىتشىلىككە قاتەر توندىرەتىن ارەكەتتەرىنە باتىل قارسى تۇرادى»، – دەگەنىن ايتادى.

تاراپتاردىڭ تايۋان ماسەلەسىندەگى مامىلەلەرى قاتاڭ، سوزدەرى كەسەك بولعانىمەن كەيبىر ماسەلەلەردە جىلى قاباق تانىتىسقاندارى دا ايتىلادى. قىتاي باسشىسى بايدەندى «ەسكى دوسىم» دەپ اتاعان بولسا، بايدەن ءشيدى «ءاردايىم اشىق، انىق پىكىرلەسىپ تۇرعانى» ءۇشىن قۇرمەتتەيتىنىن ايتقانى دا بار.

The Qazaq Times