كەشە، 7 ءساۋىر كۇنى قىتايدىڭ اۋە كۇشتەرىنە قاراستى 15 اسكەري ۇشاعى تايۋاننىڭ (تايۆان) وڭتۇستىك-باتىس اۋە قورعانىسىن يدەنتيفيكاتسيالاۋ ايماعىنا كىردى. بەيجىڭنىڭ اۋە كۇشتەرى ارقىلى جاساعان قىسىمدارى تايۋان مەن ونىڭ اينالاسىنداعى تىنىق مۇحيتى ەلدەرىن الاڭداتۋدا. اقش مەملەكەتتىك دەپارتامەنتى سول كۇنى بۇل تۋرالى ارنايى مالىمدەمە جاساپ، قىتايدىڭ ازيا-تىنىق مۇحيتى ايماعىنداعى كورشىلەرىن قورقىتۋ ارەكەتتەرىنە الاڭداۋشىلى ءبىلدىردى. سونداي-اق، ءوڭىردىڭ قاۋىپسىزدىگى مەن تۇراقتىلىعىن ساقتاۋ ءۇشىن ءوزىنىڭ وداقتاس سەرىكتەرىمەن تىعىز ىنتىماقتاستىقتى جالعاستىراتىنىن الا تارتتى.

اقش مەم. دەپارتامەنت وكىلى ءوز ەلىنىڭ تايۋان قاۋىپسىزدىگىنە باسا ءمان بەرىپ وتىرعانىن بىلدىرگەن. «قۇراما شتاتتار ءوزىنىڭ ۇزاق مەرزىمدىك مۇددەلەرىن ساقتاۋ نەگىزىندە، «تايۋان قاتىناستارى تۋرالى» زاڭدا كورسەتىلگەندەي، اقش تايۋان حالقىنىڭ قاۋىپسىزدىگىنە نەمەسە الەۋمەتتىك-ەكونوميكالىق جۇيەسىنە قاۋىپ ءتوندىرۋ ءۇشىن جاسالعان كەز-كەلگەن كۇش قولدانۋ نەمەسە ماجبۇرلەۋ ارەكەتتەرىنە قارسى قابىلەتىن ساقتاي بەرەدى»، – دەدى مەملەكەتتىك دەپارتامەنت وكىلى ەدۋارد پرايس.

بۇنىمەن قىتاي ۇشاقتارى العاش رەت تايۋان اۋە كۇشتەرىنىڭ شارلاۋ ايماعىنا كىرىپ وتىرعان جوق. بىلتىر جىل سوڭىنان بەرى بۇنداي ارەكەتتەر ءجيى قايتالانۋدا. دەگەنمەن، ءبىر مەزگىلدە 15 اسكەري ۇشاقتىڭ تايۋان كەڭىستىگىندە پايدا بولۋى سيرەك بولىپ كەلدى. امەريكالىق اسكەري ساراپشىلار بۇنى قىتايدىڭ تايۋان اۋە كۇشتەرىنە قىسىم جاساي وتىرىپ، ولاردىڭ قارسىلاسۋعا دەگەن ەرلىك-جىگەرىن مۇقالتۋ ارەكەتى دەپ سانايدى.

تايۋان قاۋىپسىزدىگى اقش پەن قىتاي اراسىندا تەڭدەي اسا سەزىمتال ماسەلەگە اينالدى. ەكى ەلدىڭ تەحنولوگيالىق دامۋى ءۇشىن تايۋاننىڭ ماڭىزى اسا زور بولعاندىقتان قازىر اقش پەن قىتايدىڭ قاقتىعىس نۇكتەسى دە تايۋان بولادى دەگەن بولجامدار كوپ.

“The Qazaq Times”