بايدەن مەن ەۋرووداق قىتاي-رەسەي ساياساتىن تالقىلادى

رەسەي، قىتاي، تۇركيامەن قارىم-قاتىناس، سونداي-اق پاندەميا مەن كليماتتىڭ وزگەرۋىنە قارسى كۇرەس ەۋروپالىق وداق ءسامميتىنىڭ باستى تاقىرىبى بولدى. ونلاين فورماتتاعى تالقىعا اقش پرەزيدەنتى دجو بايدەن دە قاتىستى. بىراق، رەسەيدەگى «ساياسي قىسىمعا» قارسى شارالار قولدانۋ تۋرالى ستراتەگيالىق پىكىرتالاس كەلەسى سامميتكە اۋىستىرىلدى.

جيىندا مالىمدەمە جاساعان گەرمانيا كانتسلەرى انگەلا مەركەلدىڭ پىكىرىنشە، سامميتكە بايدەننىڭ قاتىسۋى ەۋرووداقتىڭ اقش-پەن تىعىز ىنتىماقتاستىعىنىڭ ءبىر دالەلى. سوڭعى رەت 2009 جىلدىڭ ساۋىرىندە اق ءۇي باسشىسى رەتىندە باراك وباما ەۋرووداق سامميتىنە قاتىسقان. دجو بايدەن سول جىلدارى اقش ۆيتسە-پرەزيدەنتى قىزمەتىن اتقاردى.

نەگىزىنەن ەو سامميتىندە رەسەيمەن قارىم-قاتىناس تۋرالى ستراتەگيالىق پىكىرتالاس وتكىزۋ جوسپارلانعان بولاتىن. بىراق پاندەميانىڭ ءۇشىنشى تولقىنى بەلەڭ العاندىقتان، بۇل تاقىرىپ كەيىنگە قالدىرىلدى. بەينەكونفەرەنتسيا قارساڭىندا ميشەل ۆلاديمير پۋتينگە ءبىر شارت قويدى: ەگەر رەسەي مينسك كەلىسىمدەرىن ورىنداۋدا ناتيجە كورسەتسە، باتىس ەلدەرىنە قارسى گيبريدتى جانە كيبەرشابۋىلداردى توقتاتىپ، ادام قۇقىقتارىن ساقتاۋ پرينتسيپىنە باعىنسا عانا ەۋرووداق رەسەيگە قاتىستى ۇستانىمىن وزگەرتەدى.

ال اقپاننىڭ باسىندا ەو-نىڭ سىرتقى ساياسات جونىندەگى جوعارعى وكىلى جوزەپ بوررەل ماسكەۋگە ساپارلاي باردى. كەيىن سىرتقى ىستەر مينيسترلەرى ەو كەڭەسىنىڭ وتىرىستارىندا رەسەيمەن قارىم-قاتىناستى ءجيى تالقىلاي باستادى. ەۋرووداق وكىلى بۇل جونىندە: «رەسەي ەو-عا قارسى ۇستانىمدى تاڭداعانى انىق. رەسەيدە دە، شەشەنستاندا دا، ودان تىس جەرلەردە دە ادام قۇقىقتارى كۇننەن كۇنگە تاپتالىپ جاتىر. رەسەي بيلىگى بۇل ماسەلەلەردى شەشۋگە قۇلىقسىز ەكەنىن كورسەتتى. ياعني رەسەي اۆتوريتارلىق مەملەكەت باعىتىن تاڭداپ، ەۋروپادان الىستاپ بارا جاتىر. ەۋروپا بۇدان قورىتىندى شىعارۋى كەرەك»، – دەدى.

"The Qazaq Times"