بەلارۋستە بيلىك ساياساتىنا قارسى وتكەن ميتينگتە 200-دەن استام ادام ۇستالدى.

ءىىم ءباسپاسوز حاتشىسى ولگا چەمودانوۆا «پوليتسيا تاراپىنان زاڭسىز ارەكەتتەرگە جول بەرمەۋ تۋرالى بىرنەشە رەت ەسكەرتۋلەرگە قاراماستان، ازاماتتار شەرۋگە قاتىستى» دەيدى.

مينسك پەن ەلدىڭ وزگە قالالارىندا نارازىلىق اكتسياسى 9 تامىزدان بەرى جالعاسىپ جاتىر. نارازىلار پرەزيدەنت سايلاۋىنىڭ ناتيجەسى بۇرمالاندى دەپ ەسەپتەيدى. ورتالىق سايلاۋ كوميسسياسى لۋكاشەنكونى سايلاۋدىڭ جەڭىمپازى دەپ اتاعان. باتىس ەلدەرى لۋكاشەنكونىڭ جەڭىسىن مويىندامادى، وتكەن اپتادا ەقىۇ مينسكىنى ەلدە حالىقارالىق ستاندارتقا ساي قايتا پرەزيدەنت سايلاۋىن وتكىزۋگە شاقىرعان. ەۋرووداق لۋكاشەنكو مەن اينالاسىنداعى شەنەۋنىكتەرگە سانكتسيا سالدى.

سونىمەن قاتار، مۇندا تاۋەلسىز ۇيىمداردى ءتىنتۋ مەن جۋرناليستەردى قاماۋعا الۋ جيىلەگەن. 17 اقپاندا بەلارۋستە پوليتسيا ونداعان جۋرناليست پەن قۇقىق قورعاۋشىلارعا ءتىنتۋ جۇرگىزگەن بولاتىن. ءتىنتۋ ەلدىڭ بارلىق وبلىس ورتالىقتارىندا – مينسك، برەست، گومەل جانە باسقا ايماقتاردا تاڭەرتەڭ باستالعان. ناتيجەسىندە، بەلگىسىز سەبەپتەرمەن ەكى ادام قاماۋعا الىنعان. مينسكىدە ولار بەلارۋس جۋرناليستەر قاۋىمداستىعىنىڭ باسشىلىعىنا دا ءتىنتۋ جۇرگىزدى. كەيىننەن پوليتسيا ۇيىمنىڭ كەڭسەسىنە دە باردى. بۇل تاۋەلسىز ۇيىم 1995 جىلى بەلارۋس جۋرناليستەرىنىڭ رەسمي وداعىنا قارسى قۇرىلعان.

گومەلدە سەگىز تاۋەلسىز جۋرناليست پەن قۇقىق قورعاۋشىلار، موگيلەۆتە ەكى جۋرناليست جانە «ۆەسنا» رتالىعىنىڭ ەكى ايماقتىق قىزمەتكەرىن تەكسەردى. ساراپشىلار بەلارۋس بيلىگىنىڭ بۇل قادامىن «ءسوز بوستاندىعىنا قايشىلىق جانە ديكتاتۋرانىڭ ايقىن كورىنىسى» دەپ سانايدى.

"The Qazaq Times"