ۋكراينانىڭ مينيسترلەر كابينەتى ۇلتتىق قاۋىپسىزدىك جانە قورعانىس كەڭەسىنە (ۇقك) بەلارۋستىڭ 52 ازاماتىنا سانكتسيا ەنگىزۋدى ۇسىندى.

قارا تىزىمگە ەنگەندەر قاتارىندا پرەزيدەنتتىڭ ۇلكەن ۇلى ياعني لۋكاشەنكونىڭ ۇلتتىق قاۋىپسىزدىك ماسەلەلەرى جونىندەگى كەڭەسشىسى جانە بەلارۋس قاۋىپسىزدىك كەڭەسىنىڭ مۇشەسى، پرەزيدەنتتىڭ ءباسپاسوز حاتشىسى ناتاليا ەيمونت، كگب باسشىسى يۆان تەرتەل، ىشكى ىستەر ءمينيسترى يۆان كۋبراكوۆ بار. ءتىزىم ۋكراينا ۇكىمەتىنىڭ سايتىندا جاريالاندى.

مينيسترلەر كابينەتىنىڭ بۇيرىعىنا سايكەس، ءبىر اي ىشىندە سانكتسيالار ءتىزىمى ۇقكد قاراۋىنا جىبەرىلەدى. سانكتسيالار 3 جىل بويىنا كۇشىن جويمايدى. قارار جوباسىندا ۋكراين تارابى ەۋروپالىق كەڭەستىڭ 2020 جىلعى 2 قازانداعى جانە 6 قاراشاداعى شەشىمدەرىن ەسكەرە وتىرىپ سانكتسيالار دايىنداپ جاتقانىن حابارلادى.

بىلتىر 9 تامىزدا بەلارۋستە پرەزيدەنتتىك سايلاۋ ءوتىپ، الەكساندر لۋكاشەنكو كەزەكتى مارتە پرەزيدەنت اتاندى. سايلاۋدان كەيىن ەلدە ءىرى نارازىلىق شەرۋلەرى ءوتتى. ەۋروپانىڭ بىرقاتار ەلدەرى مەن اقش سايلاۋ ناتيجەلەرىن مويىنداماعان جوق. سول كەزدەن بەرى «ەۋروپانىڭ سوڭعى ديكتاتورى» اتانعان لۋكاشەنكو رەجيمى سانكتسيا قۇرساۋىندا قالدى.

ماۋسىمنىڭ سوڭىنان باستاپ ەۋروپالىق وداقتىڭ بەلارۋسكە قارسى ەكونوميكالىق سالالىق سانكتسيالارى كۇشىنە ەندى. مۇنداي ەكونوميكالىق شەكتەۋ شارالارى مينسككە العاش رەت ەنگىزىلدى.

22 ماۋسىمدا بەلارۋستە 78 ادام مەن سەگىز مەكەمە ەۋروپالىق وداقتىڭ ەكونوميكالىق سانكتسياسىنا ىلىكتى. قارا تىزىمگە ەنگەندەر قاتارىندا دەپۋتاتتار، پروكۋرورلار، سۋديالار جانە لۋكاشەنكونىڭ ۇلى دميتري مەن كەلىنى ليليا بار. سانكتسيالىق تىزىمگە ەنگەندەردىڭ ەسەپشوتتارى بۇعاتتالىپ، ۆيزا بەرىلمەيدى. ەۋرووداق سانكتسياسى وتكەن ايدا بەلارۋس رەجيمىنىڭ Ryanair ۇشاعىن ماجبۇرلەپ مينسكىگە قوندىرىپ، وپپوزيتسيالىق جۋرناليست رومان پروتاسەۆيچتى ۇستاعانىنا قارسى شارا.

رەسمي مينسك حالىقارالىق ۇيىمدار مەن باتىس ەلدەرى ۇستانعان ساياساتتى «بەلارۋستىڭ ىشكى ىسىنە ارالاسۋ، ىرىتكى سالۋ» دەپ سانايدى.

"The Qazaq Times"