جاھاندىق پاندەمياعا بايدانىستى سايابىرلاي قالعان رەسەي مەن باتىس اراسىنداعى تەكە-تىرەس ناۆالنىيدىڭ ىسىنەن كەيىن قايتا جانداندى. جاقىندا رەسەي «زاڭىسىز ميتينگكە قاتىستى» دەپ ايىپتاپ گەرمانيا، پولشا جانە شۆەتسيا ەلدەرىنىڭ ءبىر-ءبىر ديپلوماتىنان ەلدەن شىعىپ كەتۋىن تالاپ ەتكەن. بۇعان جاۋاپ قىلىپ اتالعان ءۇش ەل دە رەسەيلىك ديپلوماتتاردى ەلدەن شىعارۋ شەشىم قابىلداعاندارىن ءبىلدىردى.

وتكەن جۇمادا، رەسەي ءسىم تارابى جاساعان مالىمدەمەدە گەرمانيا، شۆەتسيا جانە پولشان ەلدەرىنىڭ ءبىر-ءبىر ديپلوماتىنا  «23 قاڭتارداعى ناۆالنىيدى قولداۋ زاڭسىز شەرۋىنە قاتىسقان» دەگەن ايىپ تاققان بولاتىن. بىرەر كۇن بۇرىن ەۋروپالىق وداقتىڭ سىرتقى ساياسات بويىنشا باس كوميسسارى جوزەف بوررەل ماسكەۋگە ساپارلاي بارعان جانە بۇل ساپارىنان كەيىن ول رەسەيدىڭ مامىلەگە كەلۋ نيەتى جوق ەكەنىن ايتتى. ەندى ەو تاراپ رەسەيگە قاراتا سانكتسيا ەنگىزۋ ماسەلەسىن قاراستىرا باستادى.

ساپارىنان كەيىن بوررەل ماسكەۋگە دەگەن وكپە-رەنىشىن اشىق ايتتى: «ءباسپاسوز جيىنىنداعى اگرەسسيۆتى دراماتۋرگيا جانە مەنىڭ ساپارىم كەزىندە ەۋروپالىق ديپلوماتتاردى ەلدەن شىعارۋى، بۇنىڭ ءبارى ورىس بيلىگىنىڭ ەۋروپالىق وداقپەن كونسترۋكتيۆتى ديالوگ ورناتۋعا دەگەن نيەتىنىڭ جوق ەكەنىن كورسەتەدى»، – دەگەن بوررەل.

ونىڭ ماسكەۋ ساپارى 2-4 اقپان ارالىعىندا بولعان ەدى، ساپار بارىسىندا ول ناۆالنىي ءىسى جانە ەو مەن رف اراسىنداعى ماسەلەلەردى تالقىلاعان بولاتىن. بىراق، ونىڭ ساپارىن باتىس ەلدەرىنىڭ باسىم كوپ ساياساتكەرلەرى، ساياساتتانۋشىلارى قاتتى سىنعا الىپ، «ەۋروپالىق ديپلوماتتاردى كەمسىتتى» دەپ ايىپتادى. ءتىپتى، ونىڭ ءباسپاسوز جيىنىنداعى مالىمدەمەلەرىنە سەنبەگەندەر دە بولدى.

ەۋروپالىق ءۇش ديپلوماتتى رەسەيدەن شىعارۋ تۋرالى ماسكەۋ شەشىمى بوررەلمەن بولعان ءباسپاسوز جيىنىنان كەيىن جاريالانعان. رەسەيدىڭ بۇل قادامى باتىس ەلدەرىندە «ەو سىرتقى ساياسات جونىندەگى كوميسسارىنا قاراتا كەمسىتۋلەردىڭ سوڭعىسى» دەپ قارالۋدا. بۇدان كەيىن ەو مەن رەسەيدىڭ قارىم-قاتىناسى قايشىلىقتارمەن ۋشىعا تۇسپەك. ال، ونىڭ باسىندا ناۆالنىي تۇر دەۋگە بولادى.

“The Qazaq Times”