ترامپ اق ۇيدەن كەتتى. بايدەن قىزمەتىنە كىرىستى

اقش پرەزيدەنتى بولىپ سايلانعان دجو بايدەن مەن سايلانعان ۆيتسە-پرەزيدەنت كامالا حارريس 20 قاڭتارداعى يناۋگۋراتسيادا انت قابىلداپ، قىزمەتكە كىرىستى. ال سايلاۋ ناتيجەلەرىن مويىنداۋدان باس تارتقان دونالد ترامپ يناۋگۋراتسيا راسىمىنە قاتىسقان جوق. ول 20 قاڭتاردا تاڭەرتەڭ بايدەندى كۇتپەستەن اق ۇيدەن كەتىپ، پرەزيدەنت ۇشاعىمەن فلوريداعا اتتاندى. 

بيىلعى ۇلىقتاۋ راسىمىنە شاقىرتۋ العان ادامداردىڭ سانى كوۆيد ىندەتىنە بايلانىستى وتە شەكتەۋلى بولدى. اتاپ ايتقاندا، شاراعا كونگرەسسمەندەر، ولاردىڭ وتباسى مۇشەلەرى مەن اقش-تىڭ باراك وباما، دجوردج بۋش جانە بيلل كلينتون سياقتى بۇرىنعى پرەزيدەنتتەرى قاتىستى.

ءراسىم باستالار الدىندا ەكس-پرەزيدەنت دونالد ترامپ مەلانيامەن بىرگە فلوريداداعى پالي-بيچ حالىقارالىق اۋەجايىنان وزدەرىنىڭ رەزيدەنتسياسىنا، مار-ا-لاگو گولف كلۋبىنا دەمالۋعا كەتتى. فوتو: ۆۆس

بايدەن حالىق الدىندا انت قابىلداعاننان كەيىن پرەزيدەنت قىزمەتىندەگى العاشقى ءسوزىن دەموكراتيالىق قۇندىلىقتاردان باستادى. وتكەن قيىندىقتارعا قاراماستان دەموكراتيانىڭ ساقتالىپ قالعاندىعىن ايتتى. سونداي-اق بايدەن حالىقتى بىرىگۋگە، بىرگە جۇمىس ىستەۋگە شاقىرا كەلە، كوروناۆيرۋستان قايتىس بولعان 400 مىڭ ادامدى ەسكە الدى.

سايلانعان پرەزيدەنت دجو بايدەن كاپيتوليدەگى سالتاناتتى شاراعا ايەلى دجيلمەن بىرگە كەلدى. فوتو: ۆۆس

حالىققا ۇندەۋىندە بايدەن: «دەموكراتيا – قاسيەتتى ۇعىم، ءبىز ونى ساقتاي بىلدىك. قادىرلى وتانداستارىم. بۇل – امەريكا قۇراما شتاتتارىنىڭ كۇنى. بۇل – دەموكراتيانىڭ كۇنى. جىلدار بويى امەريكا كوپتەگەن قيىندىقتى وتكەردى. قازىر دە جاعداي كۇردەلى. بىراق حالقىمىزدىڭ بىرىگۋى ارقىلى ءبىز بارلىعىن جەڭە الامىز. ساپالى ءبىلىم بەرىپ، جاڭا جۇمىس ورىندارىن اشىپ، دەنساۋلىق ساقتاۋ جۇيەسىن جاقسارتىپ، ناسىلارالىق تەڭدىكتى دە ورناتا الامىز. كەز كەلگەن داعدارىستان شىعا الامىز. بىزگە تەك بىرىگۋ قاجەت», – دەدى.

رەسمي تۇردە پرەزيدەنتتىك قىزمەتىنە كىرىسكەن دەموكرات بايدەن اقش-تى كليمات جونىندەگى پاريج كەلىسىمىنە قايتا قوسىپ، اقش-تىڭ دۇنيەجۇزىلىك دەنساۋلىق ساقتاۋ ۇيىمىنا مۇشەلىگىن قالپىنا كەلتىردى. سونىمەن قاتار، مەكسيكامەن شەكاراداعى دۋال قۇرىلىسىن توقتاتىپ، مۇسىلماندار كوپ شوعىرلانعان كەيبىر ەل تۇرعىندارىنىڭ اقش-قا كىرۋىنە قويىلعان شەكتەۋدى جوياتىن بۇيرىققا قول قويعان. اتالعان كەلىسىمدەر دونالد ترامپ بيلىگى كەزىندە كۇشىن جويعان بولاتىن.

ءداستۇر بويىنشا پرەزيدەنتتى ۇلىقتاۋ ءراسىمى ۋاشينگتونداعى كاپيتوليدە ءوتتى. فوتو: ار

پاريج كەلىسىمى 2015 جىلعى 12 جەلتوقساندا كليماتتىڭ وزگەرۋى تۋرالى نەگىزدەمەلىك كونۆەنتسيادان كەيىن قابىلداندى. كەلىسىم، اتاپ ايتقاندا، پارنيكتىك گاز زيانىن ازايتۋدى كوزدەيدى. ترامپ 2017 جىلدىڭ 1 ماۋسىمىندا كەلىسىمشارتتان شىعۋ تۋرالى شەشىم قابىلدادى، ويتكەنى ول امەريكالىق جۇمىسشىلارعا، بيزنەسكە جانە سالىق تولەۋشىلەرگە ءمولدىر ەمەس ەكونوميكالىق مىندەتتەمەلەر جۇكتەلەتىنى ايتىلعان.

كاپيتوليدەگى قاقتىعىستاردان كەيىن پرەزيدەنت يناۋگۋراتسياسىنا ۇلتتىق گۆارديانىڭ 25 مىڭ اسكەرى جۇمىلدىرىلدى. فوتو: ەرا

دجوزەف بايدەننىڭ پاريج كەلەسىمىنە قايتا قوسىلۋ تۋرالى شەشىمى دەموكراتتار مەن رەسپۋبليكاشىلداردىڭ پىكىرىن ەكىگە ءبولدى. ءبىر تاراپ پاريج كەلىسىمى اقش-تى كوشباسشى ەتپەيدى دەسە، ەندى ءبىرى جاڭا پرەزيدەنتتىڭ بۇل قادامىن قولداپ وتىر.

78 جاستاعى دجو بايدەن – اقش تاريحىنداعى مەملەكەت باسشىسى قىزمەتىنە كەلگەن ەڭ قارت ساياساتكەر. ال كامالا حارريس ۆيتسە-پرەزيدەنت مانسابىنا كەلگەن العاشقى ايەل. كامالا قازىر بەدەلدى ساياساتكەر رەتىندە باق بەتتەرىندە ءجيى بوي كورسەتىپ ءجۇر. ول ەڭ الدىمەن كامالا سەناتتاعى مايك پەنستىڭ ورنىنا باردى. وسىلايشا، جوعارى پالاتاداعى باسىمدىقتى الدى. جالپى دەموكراتتار پرەزيدەنتتىك سايلاۋدا دا، وكىلدەر پالاتاسىندا دا، سەناتتا دا جەڭىسكە جەتىپ باسىمدىققا يە بولدى.

باراك وباما مەن ميشەل وباما. فوتو: ۆۆس

اق ۇيدە 4 جىل بيلىك ەتكەن دونالد ترامپ پرەزيدەنتتىك مەرزىمىنىڭ سوڭىندا اباقتىدا جازاسىن وتەپ جاتقان 73 ادامعا راقىمشىلىق جاساعانى بەلگىلى. بۇعان دەيىن اقش تاريحىندا بىردە-ءبىر پرەزيدەنت مۇنداي قادامعا بارماعان. راقىمشىلىققا ىلىنگەندەر قاتارىندا پرەزيدەنتتىڭ بۇرىنعى كەڭەسشىسى جانە دەترويت قالاسىنىڭ بۇرىنعى مەرى بار. 2016 جىلى دونالد ترامپتىڭ سايلاۋ ناۋقانىن باسقارعان، كەيىن كەڭەسشىسى بولعان ستيۆ بەننون سىبايلاستارىمەن بىرگە مەكسيكامەن شەكارادا دۋال سالۋعا جاناشىرلىق جاردەم رەتىندە بەرىلگەن ميلليونداعان دوللاردى جىمقىرعانى ءۇشىن جازاعا تارتىلعان ەدى. جەمقورلىقپەن ۇستالعان دەترويتتىڭ بۇرىنعى مەرى كۆامە كيلپاتريك 2013 جىلى 28 جىلعا سوتتالعان. دونالد ترامپ تاعى 70 ادامعا وتەپ جاتقان جازاسىن جەڭىلدەتتى.

امەريكاداعى ءىرى ساياسي جاعدايدىڭ ءبىرى – ترامپقا ەكىنشى رەت يمپيچمەنت جاريالاۋ. اقش كونگرەسىنىڭ وكىلدەر پالاتاسى يمپيچمەنت جاريالاعاننان كەيىن قۇجات سەناتقا قاراۋىنا ءوتتى. دەگەنمەن، ساراپشىلار ترامپ «مەملەكەتكە قاۋىپ توندىرمەگەندىكتەن» ەكىنشى مارتە يمپيچمەنت ەنگىزۋدىڭ قاجەتى شامالى دەپ سانايدى.

كامالا ءحارريستىڭ انت بەرۋ ءساتى. فوتو: ار

ۇلىقتاۋ راسىمىنە كەلگەن بيلل كلينتون مەن حيللاري كلينتون. فوتو: ۆۆس

كىشى دجوردج بۋش ايەلىمەن. فوتو: ار

"The Qazaq Times"