«ۇلكەن جەتىلىك» ءسامميتى باستالدى: دەرجاۆالاردىڭ قىتايعا دەگەن ۇستانىمى بەلگىلى بولماق

ۇلىبريتانيادا «ۇلكەن جەتىلىك» ەلدەرى باسشىلارىنىڭ ءسامميتى باستالدى. شارا 13 ماۋسىمعا دەيىن جالعاسادى.

G7 قۇرامىنداعى اقش، ۇلىبريتانيا، كانادا، گەرمانيا، فرانتسيا، يتاليا، جاپونيا كوشباسشىلارى پاندەميا باستالعالى العاش رەت وفلاين فورماتتا كەزدەسىپ وتىر. بۇدان بولەك، سامميتكە  اۆستراليا، ءۇندىستان، وڭتۇستىك كورەيا، وڭتۇستىك افريكا جانە ەۋرووداق ەلدەرىنىڭ باسشىلارى قوناق رەتىندە شاقىرىلعان.

جيىندا ىندەتتەن كەيىن الەم ەكونوميكاسىن قالپىنا كەلتىرۋ مەن وزگە دە حالىقارالىق وزەكتى ماسەلەلەر تالقىلانباق. كەلىسسوزدىڭ كوبى جابىق ەسىك فورماتىندا وتەدى. شارا وتەتىن كورنۋولل گرافتىعىندا قاۋىپسىزدىك كۇشەيتىلگەن. بىراق وسىعان قاراماستان جەرگىلىكتى ۇيىم وكىلدەرى نارازىلىق شاراسىن وتكىزدى.

ۇلىبريتانياعا كەلگەن اقش پرەزيدەنتى دجو بايدەن بەيسەنبىدە ەكونوميكالىق دامۋى تومەن جانە ورتاشا 92 ەل، سونداي-اق افريكا وداعى ۆاشينگتوننان Pfizer كومپانياسى شىعارعان پرەپاراتتىڭ 500 ميلليون دوزاسىن الاتىنىن ايتتى. ۇلىبريتانيا پرەمەر-ءمينيسترى بوريس دجونسون ءوز كەزەگىندە كەلەسى جىلدىڭ سوڭىنا دەيىن لوندون مۇقتاج ەلدەرگە ۆاكتسينانىڭ 100 ميلليوننان استام دوزاسىن جىبەرەدى دەپ ۋادە بەردى. كەيىن تاراپتار اتلانت حارتياسىنا قول قويدى.

ءسامميتتىڭ ءبىرىنشى كۇنى اقش، ۇلىبريتانيا، كانادا، يتاليا، فرانتسيا، گەرمانيا، جاپونيا جانە ەۋروپالىق وداق كوشباسشىلارى ءىى ەليزاۆەتا پاتشايىمنىڭ قاتىسۋىمەن سالتاناتتى شاراعا قاتىسادى. قابىلداۋ جابىق بوتانيكالىق باقتا، ۇلكەن گەودەزيالىق كۇمبەزدەرىمەن تانىمال كورنۋوللداعى ەدەمدە وتەدى.

حالىقارالىق كەڭەستەن كەيىن الەمنىڭ، انىقتاپ ايتقاندا اقش پەن ونىڭ بىرقاتار وداقتاستارىنىڭ قىتايعا دەگەن ۇستانىمدارى انىق بولماق. بۇعان دەيىن اق ءۇي: «پرەزيدەنت بايدەن ءبىزدىڭ ۇجىمدىق باسەكەگە قابىلەتتىلىگىمىزدى ارتتىرۋ ءۇشىن ينۆەستيتسيالاۋ قاجەتتىلىگى تۋرالى جانە قىتايدان تۋىندايتىن ەكونوميكالىق قيىندىقتارعا جاۋاپ بەرۋ ءۇشىن جاھاندىق ەرەجەلەردى جاڭارتۋدىڭ ماڭىزدىلىعىن تالقىلايدى»، – دەگەن بولاتىن.

"The Qazaq Times"