امەريكا قۇراما شتاتتارىنىڭ پرەزيدەنتى جو بايدەن وتىرعان ۇشاق ەۋروپاعا قاراي ۇشتى. بۇل ونىڭ اق ءۇي قوجايىنى بولعاننان بەرگى العاشقى مەملەكەتتىك ساپارى. بۇل ساپارىنىڭ كۇن تارتىبىندە بايدەن بىرقاتار ماڭىزدى كەزدەسۋلەردى وتكىزبەك. سونىڭ ىشىندە ەڭ ەلەۋشىسى G7 سامميتىنە قاتىسۋ. ساپار الدىندا بايدەن رەسەي پرەزيدەنتى پۋتينگە قاراتا قاتاڭ ەسكەرتۋىن دە ايتىپ كەتتى.

بايدەن اقش-تىڭ ءبىرىنشى حانىمىن ەرتىپ ساپارعا اتتاندى. فوتو: AP.

بايدەننىڭ العاشقى شەتەلدىك ساپارى ۇلىبريتانيادان باستالادى. بۇل اقش پرەزيدەنتتەرىنىڭ وزگەرمەي كەلە جاتقان، وزگەرە قويمايتىن ءداستۇرى. ساپارىنىڭ العاشقى كۇنتارتىبى بريتانيا باس ءۋازىرى بوريس جونسونمەن كەزدەسۋ. بۇدان كەيىن بريتانياداعى بىرقاتار ماڭىزدى كەزدەسۋلەرىن باستايدى. 13 ماۋسىمدا بايدەن بىرىككەن كورولدىكتىڭ پاتشايىمى ەليزاۆەتا ءىى-گە كەزدەسىپ، ومىردەن قايتان حانزادا ءفيليپپتىڭ ورىنىن جوقتاپ كوڭىل ايتادى.

بوريس جونسون مەن بايدەن حانىمدارىمەن وتباسىلىق كەزدەسۋىندە. فوتو: BBC.

وسىدان كەيىن اقش پرەزيدەنتى بەلگيانىڭ باس قالاسى بريۋسسەلگە اتتانىپ، ناتو سامميتىنە (14 ماۋسىمدا وتەتىن) قاتىسادى. 15 ماۋسىمدا تاعى سول بريۋسسەلدە اقش-ەو سامميتىنە بولىپ، 16 ماۋسىم كۇنى جەنەۆادا رەسەي پرەزيدەنتى ۆلاديمير پۋتينمەن كەزدەسپەك.

بايدەن ساپارىنىڭ الدىندا پۋتينگە باعىتتاپ ەسكەرتۋ جاساپدى، ول رەسەي ۇكىمەتىنىڭ قۇراما شتاتتارعا قارسى "زياندى ارەكەتتەرىن تەز ارادا توقتاتۋىن", ەگەر بۇل ارەكەتتەر جالعاسىن تاپسا اقش "اسا پارمەندى ءارى بەلسەندى جاۋاپ بەرەتىنىن" ەسكەرتتى.

بايدەننىڭ كەزەكتى ساپارىنا الەم ەلدەرى باسا نازار اۋدارادى. سەبەبى، بۇل ساپاردا اقش پرەزيدەنتى ەڭ ىقپالدى ەلدەر مەن حالىقارالىق ۇيىمداردىڭ جەتەكشىلەرىمەن كەزدەسىپ، قازىرگى حالىقارالىق ماڭىزدى ماسەلەلەردى، قۇبىلىپ تۇرعان حالىقارالىق تارتىپتەر تۋراسىندا سويلەسەدى.

“The Qazaq Times”