كەيبىر داۋلى ماسەلەلەرگە قاراماستان جوزەف بايدەن اقش-تىڭ 46-شى پرەزيدەنتى رەتىندە اتالا باستادى. ترامپتىڭ ناتيجەگە قارسى جوعارى سوتقا ارىزدانىپ جاتقان ارەكەتتەرىنەن ءونىم بولماسا، بايدەن اق ءۇيدىڭ باسشىسى بولماق. الداعى ۇكىمەتتى كىم جەتەكتەسە دە ونىڭ الدىندا بىرقاتار اۋىر مىندەتتەر تۇر. جاڭا ءتاج ەپيدەمياسى، توسىن ەكونوميكالىق قۇلدىراۋ، وتكىر الەۋمەتتىك قايشىلىقتار جانە سايلاۋشىلار اراسىنداعى تەرەڭ ساياسي كەلىسپەۋشىلىكتەر جاعدايىندا اقش سىرتقى ساياساتىنىڭ، ونىڭ ىشىندە قىتايمەن قاتىناستارىنىڭ ەڭ وزەكتى ماسەلەسى قانداي بولۋى مۇمكىن؟

پرەزيدەنتتىڭ كىم بولعانىنا تاۋەلسىز، اقش ۇكىمەتىنىڭ باستى مىندەتى قىتايمەن ەكى جاقتى قارىم-قاتىناس بولماسا كەرەك. قىتاي تاقىرىبىن ەكىنشى نەمەسە ءۇشىنشى ورىنعا قويا تۇرىپ، ەل ىشىندەگى تەرەڭ ساياسي قايشىلىقتاردى رەتكە كەلتىرۋ مىندەتى تۇر. كوپتەگەن ساراپشىلار اقش ۇكىمەتىنىڭ كوزالداعى مىندەتى «امەريكالىق بولمىستى» ياعني «امەريكالىق دەموكراتيالىق جۇيەنى دامىتۋ» كەزەك كۇتتىرمەيدى دەپ سانايدى.

كەزەكتى سايلاۋ، اقش-تاعى اسقىنعان ساياسي ءبولىنىستى كورسەتكەندەي بولدى. دەموكراتيا مەن ادىلەت ۇعىمدارى اراسىندا دا بەلگىلى دەڭگەيدە قايشىلىقتار كورىنە باستادى، تەرەڭ تەوريالىق تۇسىنىك بەرۋدى قاجەت ەتەتىن سۇراقتار دا تۋىندادى. قىتايمەن الەمنىڭ كوشباسشىلىق تالاسىنا تۇس كەلىپ تۇرعان كەزدە، اقش قوعامىنداعى بۇل جاعداي ساياساتكەرلەردى الاڭداتىپ وتىر.

اقش-تىڭ قىتايداعى بۇرىنعى ەلشىسى ۆينستور لورد بايدەن اكىمشىلىگىنە مىناداي ءۇش ۇلكەن ءۇمىتتى ارتقان ەكەن: بىرىنشىدەن، امەريكالىق دەموكراتيالىق جۇيەنى جاقسارتىپ، تەرەڭ ساياسي ءبولىنىپ-جارىلۋدى توقتاتۋ، امەريكالىقتاردى بىرىكتىرۋ. ەكىنشىدەن، قىتايمەن باسەكەگە تۇسە الۋ ءۇشىن بولاشاققا ينۆەستيتسيا سالۋ، كەيبىر ماسەلەلەر بويىنشا كەلىسىمگە دە كەلۋ، ايتالىق ينفراقۇرىلىم، ءبىلىم، ەنەرگەتيكا، دامىعان عىلىم مەن تەحنولوگيالار، جاساندى ينتەللەكت،  5G جانە ت.ب. ۇشىنشىدەن، وداقتاستارمەن ىنتىماقتاستىقتى نىعايتۋ. لورد اقش ءوز وداقتاستارىمەن ىنتىماقتاستىعى بەكەم بولعاندا عانا قىتايدى كەلىسىمگە كوندىرۋگە بولادى. ول سونداي-اق، ترامپ كەزىندە شىعىپ كەتكەن ترانس-تىنىق مۇحيتى ساۋدا كەلىسىمىنە قايتا قوسىلۋدى ۇسىنعان.

ۆينستون لورد قۇراما شتاتتاردىڭ بارلىق حالىقارالىق كەلىسىمدەر مەن ۇيىمدارعا قايتىپ ورالۋىن ءۇمىت ەتەدى. بۇل قۇراما شتاتتاردىڭ حالىقارالىق كوشباسشىلىق ورنىن قالپىنا كەلتىرەدى دەپ سانايدى. اقش بۇل ورنىن قالپىنا كەلتىرمەي جاتىپ، قىتايعا قارسى كۇرەسۋگە بولمايتىنىن،  سودان كەيىن عانا «قىتايعا قارسى بىرىككەن مايدان» قۇرۋى كەرەك دەپ سانايدى.

“The Qazaq Times”