تۇركيا ورتا شىعىستاعى ءوز مۇددەسىن سوڭىنا دەيىن قورعايتىنىن اشىق ءبىلدىردى. بۇنداي مالىمدەمەنى تۇركيا پرەزيدەنتى رەجەپ تايىپ ەردوعان جاساپ وتىر.

تۇرىك پرەزيدەنتى كاتاردىڭ The Peninsula اتتى اعىلشىن تىلىندەگى باسىلىمىنا سۇحبات بەرىپ، انكارانىڭ ورتا شىعىستاعى ساياساتى تۋرالى بىرقاتار ماسەلەلەردى اشىق ورتاعا سالعان. ايتالىق، كاتار مەن سيريا جەرىندەگى تۇرىك قارۋلى كۇشتەرىنىڭ ميسسياسى تۋرالى توقتالعان.

كاتارداعى تۇرىك اسكەرلەرىنىڭ كاتاردىڭ، سونداي-اق پارسى شىعاناعى ايماعىنىڭ تۇراقتىلىعى ءۇشىن قىزمەت ەتەتىنىن ايتقان ەردوعان: «تۇرىك اسكەرلەرىنىڭ كاتاردا بولۋىنان ەشكىم قاۋىپتەنبەسە كەرەك. ەگەر ونى قاۋىپ دەپ سانايتىندار ايماقتا تۇراقسىزدىق ورناتۋدى كوزدەيتىندەر بولماق»، – دەگەن.  

پرەزيدەنت ەردوعان سيرياداعى قارۋلى كۇشتەرى تۋرالى سوزىندە تۇرىك اسكەرلەرىنىڭ سيريا جەرىندە ماڭگى قالىپ قويمايتىنىن ايتقان. «ءبىز ەشكىمنىڭ تەرريتورياسىنا قىزىقپايمىز. داعدارىس تۇبەگەيلى شەشىلگەن كەزدە ءبىزدىڭ سيرياداعى ءىسىمىز دە اقىرلاسادى. ءبىز ونداعى تەررورلىق توپتارمەن سوڭىنا دەيىن تاباندى تۇردە كۇرەسەمىز»، – دەگەن ەردوعان.

بۇدان تىس سۇحباتىندا تۇركيا پرەزيدەنتى ليۆيا مەن شىعىس جەرورتا تەڭىزىندەگى داۋلى ماسەلەر بويىنشا دا ءوز كوزقاراسىن بىلدىرگەن. ول تۇركيانىڭ اتالعان ايماقتاردا ءوز مۇددەسىنەن ەشقاشان باس تارتپايتىنىن ايتقان.

بۇگىندە تۇركيانىڭ قارۋلى كۇشتەرى ورتا شىعىستا كاتار مەن ءسۇريادا اسكەري مىندەت وتەپ جاتىر. سيريا داعدارىسى باستالعاننان بەرى تۇركيا نەگىزگى ويىنشىلاردىڭ ءبىرى بولىپ قاتىستى. قازىر سيريانىڭ سولتۇستىك باتىسى، سولتۇستىگى جانە سولتۇستىك شىعىس اۋماعىندا تۇركيا قارۋلى كۇشتەرى ىقپالدى باقىلاۋ جۇرگىزىپ تۇر. وزىنە جاقىن يدليب نەگىزىنەن تۇرىك قارۋلى كۇشتەرىنىڭ باقىلاۋىندا. بۇل ايماقتاردا ميلليونداعان بوسقىندار ۋاقىتتىق باسپانالاردا تۇرىپ جاتىر. ال، كاتار داعدارىسى باستالعاننان كەيىن (2017 جىلى ماۋسىم) تۇركيا اسكەرى كاتارعا دا بارعان بولاتىن. ليۆيا جەرىندە دە انكارا ءوزىن نەگىزگى ويىنشىلاردىڭ ءبىرى ەتىپ كورسەتۋدە.

بۇل قادامدار ارقىلى تۇركيا ايماقتىق دەرجاۆا ەكەنىن كورسەتۋگە تىرىسادى. دەگەنمەن، تۇركيانىڭ باتىس ەلدەرىنىڭ ورتا شىعىس ساياساتى مەن ستراتەگياسىندا دەلدالدىق ءرولىنىڭ دە بار ەكەنىن ەسكەرۋ كەرەك. ناتو مۇشەسى بولعان تۇركيا ءوزىنىڭ ناتو ەلدەرى ءۇشىن ماڭىزدى ستراتەگيالىق ورنالاسۋىنان پايدالانىپ ءوز تالاپتارىن ورىنداتۋعا تىرىسادى. بىراق، كەيبىر مۇددەلەر تۇرعىسىندا ناتو مەن تۇركيانىڭ دا كەلىسپەيتىن تۇستارى كوپ.

“The Qazaq Times”