مينيستر مالىمدەمەسى: 3,3 ملن وقۋشىنى تەحنيكامەن قامتۋدى قاداعالايتىن قوعامدىق باقىلاۋ قاجەت

سەيسەنبى كۇنگى، 4 تامىزدا وتكەن ۇكىمەت وتىرىسىنىڭ كۇن تارتىبىندە قاراستىرىلعان ەكى ماسەلەنىڭ بىرىندە جاڭا 2020-2021 وقۋ جىلىنىڭ باستالۋىنا دايىندىق تۋرالى مينيستر اسحات ايماعامبەتوۆ پەن ءوڭىر اكىمدەرى مالىمدەمە جاسادى.

ءبىلىم ءمينيسترى اسحات ايماعامبەتوۆتىڭ سوزىنشە، ەپيدەميولوگيالىق جاعدايعا بايلانىستى 1 قىركۇيەكتەن باستاپ وقۋ جىلى قاشىقتان جۇرگىزىلەدى. ەكى ەرەكشەلىك بار. بىرىنشىدەن، ىندەت جاعدايى وڭالسا، شالعايداعى ەلدى مەكەندەردەگى شاعىن جيناقتالعان مەكتەپتەر وقۋدى ءداستۇرلى تۇردە باستايدى. ەكىشىدەن، اتا-انالاردىڭ ءوتىنىشى بويىنشا باستاۋىش سىنىپ وقۋشىلارى ءۇشىن كەزەكشى سىنىپتار اشىلادى. بۇل كەزدە 15 وقۋشى ءبىر كابينەتتە ءبىر مۇعالىممەن عانا وقۋشى. ءۇزىلىس ۋاقىتتارى ءارتۇرلى بولماق.

– سونىمەن ءبىزدىڭ بولجاۋىمىزشا، 2,6 ملن وقۋشى ينتەرنەت-تەلەديدار ارقىلى قاشىقتان، 530 مىڭ بالا كەزەكشى سىنىپتاردى، 157 مىڭنان استام وقۋشى شتاتتىق فورماتتا وقيدى.

اتا-انالاردىڭ قالاۋىنا قاراي مەكتەپكە دەيىنگى ءبىلىم بەرۋ ء(بىر توپتا 15 ادامعا دەيىن) جانە قوسىمشا ءبىلىم بەرۋ (5 ادامعا دەيىن) باعىتتارىندا دا كۇندىزگى وقۋ ءتۇرى جۇرەدى. ەرەكشە بالالارعا ءبىلىم بەرەتىن ارنايى وقۋ ورىندارىندا ونلاين-كەڭەس بەرۋ نەمەسە الدىن-الا جازىلۋ ارقىلى جۇرەدى. وقۋ ورنىنا بارىپ وقيتىنداردىڭ بارلىعىنا سانيتارلىق تالاپتاردى قاتاڭ ساقتاۋ مىندەتتەلەدى، – دەدى مينيستر.

2020-2021 وقۋ جىلىندا قازاقستاننىڭ 7 391 مەكتەبىندە 3,3 ميلليوننان استام وقۋشى، ونىڭ ىشىندە 1 سىنىپتا 396 مىڭنان استام بالا ءبىلىم الادى. قازىرگى جاعدايدا وقۋ جىلىنىڭ ءبىرىنشى توقسانى قاشىقتان وتەدى. وقىتۋدىڭ ءداستۇرلى فورماتى بارلىق سانيتارلىق نورمالاردى قاتاڭ ساقتاي وتىرىپ، تەك شاعىن فورماتتاعى مەكتەپتەردە، سونداي-اق  باستاۋىش مەكتەپتىڭ «كەزەكشى» سىنىپتارىندا ساقتالادى. سونداي-اق ورتا جانە جوعارى وقۋ ورىندارىنا قاتىستى ءسوز بولدى.

– پەدوگوگيكالىق، ءىت، الەۋمەتتىك، گۋمانيتارلىق باعىتتاعى ماماندىقتا وقيتىن كوللەدج ستۋدەنتتەرى قاشىقتان وقيدى. ال تەحگولوگيالىق، اگرارلىق، مەديتسينا جانە ونەر باعىتتارى بويىنشا ارالاس وقىتۋ ۇسىنىلادى. سايكەسىنشە، زەرتحانالىق جانە وندىرىستك جۇمىستاردى شتاتتىق رەجيمدە وتكىزۋگە رۇقسات ەتىلەدى. جوو-دا دا وسىعان ۇقساس فورماتتا وتەدى. ماگيستراتۋرا مەن دوكتورانتۋرادا دا ارالاس وقۋ ءتۇرى جالعاسادى، – دەپ مالىمدەدى ايماعامبەتوۆ.

«جەرگىلىكتى اكىمدىكتەر مينيسترلىكپەن بىرلەسىپ مەملەكەتتىك ساتىپ الۋ شاراسىن جۇرگىزىپ جاتىر. تاحنيكا جاعىنان ۇلكەن تاپشىلىق بارىن اشىق ايتۋ كەرەك» دەگەن ءمينيستردىڭ ءسوزىن ۇكىمەت باسشىسى اسقار مامين قولداعانداي بولدى.

«ۇكىمەت اسا مۇقتاج وتباسىلاردىڭ بالالارىنا پايدالانۋ ءۇشىن شامامەن 500 مىڭ كومپيۋتەر بەرۋدى قامتاماسىز ەتەدى. سونداي-اق اكىمدىكتەر جەرگىلىكتى دەڭگەيدە كومپيۋتەر تەحنيكاسىمەن قامتاماسىز ەتۋ ماسەلەسىن پىسىقتاسىن»، — دەدى پرەمەر-مينيستر.

قىسقا قايىرعاندا، جوسپار بويىنشا 25 تامىزعا دەيىن وقۋلىقتار تولىقتاي بەرىلىپ، قاشىقتان وقۋعا پايدالاناتىن ونلاين كونتەنت ماتەريالدار دايىن بولۋى ءتيىس. وقۋلىقتىڭ بارىندە مىندەتتى تۇردە ەلەكتروندى نۇسقاسى جانە ونىڭ قولجەتىمدى بولۋى قاجەت.

ونمىڭداعان تەحنيكانى ساتىپ الۋدى جۇرگىزۋگە جاۋاپتى مينيسترلىك پەن اكىمدىكتەردىڭ مەملەكەت قاراجاتىن دۇرىس جۇمساپ، سوڭى ەكونوميكالىق قىلمىسقا اينالمايتىنداي بولسا دەگەن ەل تىلەگى بار. الداعى ۋاقىتتا ميلليردتاعان قاراجاتتىڭ جۇمسالۋىن رەداكتسيا باقىلاۋعا الاتىن بولادى.

   "The Qazaq Times"