كوروناۆيرۋس قىتاي ەكونوميكاسىن قانشالىقتى تۇرالاتتى؟

جىلدىڭ العاشقى ەكى ايىندا قىتاي ەكسپورتى كۇرت قىسقارىپ كەتتى. بۇعان كوروناۆيرۋستىڭ تارالۋى سەبەپ بولعانىن جۇرت جاقسى ءبىلىپ وتىر. ۆيرۋستىڭ تارقالۋى ىسكەرلىك وپەراتسيالاردى، قىتايدىڭ عانا ەمەس دۇنيە ءجۇزىنىڭ جەتكىزۋ جەلىلەرىنىڭ قىزمەتىن بۇزدى. سوعان قوسا الەمنىڭ ەكونوميكالىق بەلسەندىلىگىن السىرەتتى. دەگەنمەن، كوروناۆيرۋستىڭ ەكونوميكاعا جاساعان كەرى ىقپالى ساراپشىلاردىڭ بولجاعانداي اۋىر بولمادى.

ساۋدا تۋرالى ەسەپتەن بەيجىڭ بيلىگىن قاتتى الاڭداتۋدا. سەبەبى، ىندەت پەن ۇكىمەتتىڭ وعان قارسى قاتاڭ شارالارى زاۋىت وندىرىستەرىن السىرەتىپ جىبەردى. ناتيجەسىندە سۇرانىس تا وتە كوپ مولشەردە قىسقارىپ كەتتى. جىلدىڭ العاشقى توقسانىنداعى قىتايدىڭ ەكونوميكالىق ءوسىمى 1990 جىلدان بەرگى ەڭ تومەنگى شەككە تۇسەدى دەگەن بولجام بار.

بۇگىن، 7 ناۋرىز كۇنى جاريا ەتكەن قىتايدىڭ كەدەن قىزمەتى سالاسىنىڭ مالىمەتىنە قاراعاندا شەتەلگە جۇك تاسىمالداۋ مولشەرى بىلتىرعى جىلمەن سالىستىرعاندا 17,2 پايىزعا ازايعان. مالىمەتتەرگە قاراعاندا، قىتايداعى فابريكالاردىڭ بەلسەندىلىگى داعدارىس جىلدارىنان دا كوبىرەك تومەندەپ كەتكەن.

قىتايدىڭ ەكسپورتى عانا ەمەس، يمپورتىندا دا كوپ قۇلدىراۋ بار، جەلتوقسان ايىندا اقش پەن قىتاي اراسىندا جاڭا ساۋدا كەلىسىمىنە بايلانىستى قىتاي يمپورتى ارتا تۇسكەن ەدى. ال، جىل باسىنان بەرى كەرى كەتە باستادى، بىلتىرعى وسى ۋاقىتپەن سالىستىرعاندا 4 پايىزعا كەمىدى. وسىدان كەيىن قىتايدىڭ ساۋدا شىعىنى 7,4 ملرد. اقش دوللارىن قۇرادى، دەگەنمەن، «رەيتەردىڭ» الدىن الا بولجامىندا 24 ملرد. دوللاردان اسادى دەگەن ەدى.

ۆيرۋس جاعدايى قىتايدا تۇراقتانا باستاعانىمەن، كوپتەگەن كومپانيالار قىزمەتىن قالپىنا كەلتىرۋگە ءالى دە بىرەر اي ۋاقىت كەرەك. وسىعان قاراعاندا قىتايدىڭ ءوندىرىسى ءساۋىر ايىنا قاراي قالپىنا كەلۋى مۇمكىن دەگەن بولجامدار ايتىلۋدا. ال، وسى قىتاي ەكونوميكاسىنداعى كىدىرىس ونىڭ ساۋدا سەرىكتەرىنە دە ءوز اسەرىن تيگىزبەك.

“The Qazaq Times”