گرەكيا شەكاراسىندا سۇريالىق بوسقىندار: ەۋروپا يدليب سوعىسىنان نەگە الاڭدايدى؟

تۇركيانىڭ اۋە قورعانىس كۇشتەرى يدليب اۋە كەڭىستىگىنەن ءسۇريا ۇكىمەت كۇشتەرىنە تيەسىلى ەكى ۇشاقتى اتىپ ءتۇسىردى. بۇعان قوسا تۇركيا-ءسۇريا كۇشتەرىنىڭ قۇرلىقتاعى سوعىستارى دا تولاستاعان جوق.

تۇركيا مەن ءسۇريا اراسىنداعى سوعىس قىزا تۇسكەن سايىن تۇركياعا جاقىن ەۋروپا ەلدەرى الاڭداي باستادى. سەبەبى، وسىعان دەيىن ءسۇريادان اعىلعان بوسقىندار تۇركيا جەرىندە قالىپ، ەۋروپانى 5 ميلليوننان استام (رەسمي دەرەك 3,7 ملن دەپ كورسەتەدى، كەيبىر قوعامدىق ۇيىمدار تۇركياداعى بوسقىندار سانى بۇدان الدە قايدا كوپ دەپ قارايدى) بوسقىنداردان ساقتاپ تۇرعان بولاتىن. ەگەر سوعىس ارىعا جالعاسسا تۇركياعا باس ساۋعالاعان جانە ءسۇريانىڭ يدليب جەرىندەگى بوسقىندار ەۋروپاعا اعىلۋى مۇمكىن. ونىڭ ۇستىنە تۇركيا ۇكىمەتى ەۋروپاعا ءوتىپ كەتكىسى كەلەتىن بوسقىنداردىڭ جولىن توسپايتىنىن جەتكىزدى.

ميگرانتتار اعىنىنان الاڭداعان گرەكيا بيلىگى تۇركيامەن شەكتەسەتىن بارلىق قۇرلىق جانە تەڭىز شەكارالارىنداعى توسقاۋىلدى كۇشەيتتى. وتكەن جەكسەنبىنىڭ وزىندە گرەك ارالدارىنىڭ بىرىندە 500-دەن استام بوسقىننىڭ جينالعانى بەلگىلى بولدى. ال، قۇرلىقتاعى شەكاراسىنان 10 مىڭعا جۋىق ميگرانت كەرى قايتارىلدى. كەيبىر جەرلەردە پوليتسيامەن قاقتىعىستار بولىپ، پوليتسيا كۇشتەرى كوزدەن جاس اعىزاتىن گاز قولدانۋىنا تۋرا كەلدى.

گرەكيانىڭ ۇكىمەتى جاساعان مالىمدەمەدە ميگرانتتاردىڭ گرەكياعا ۇلكەن باسىمدىق الىپ كەلگەنىن، ال انكارانى سوعان جول بەرىپ وتىر دەپ ايىپتادى. بىراق، جەكسەنبىدە تۇركيا پرەزيدەنتى رەجەپ تايىپ ەردوعان مالىمدەمە جاساپ، تۇركيا بوسقىنداردىڭ جاڭا اعىمىن توقتاتا المايتىنىن ايتتى.

ال، ءيدليبتىڭ وزىندە باشار اسادقا قارسى كۇشتەردىڭ باقىلاۋىندا 3,5 ملن شاماسىندا بوسقىن بار. يدليبتەگى سوعىس تەرەڭدەي تۇسسە وندا بوسقىنداردىڭ جاڭا تولقىنى پايدا بولىپ، بۇل تۇركياعا عانا ەمەس وعان جاقىن ەۋروپا ەلدەرىنە دە ۇلكەن الەۋمەتتىك داعدارىس الا كەلۋى مۇمكىن. يدليب سوعىسىنا كوپ ەلدىڭ باسا نازار اۋدارىپ وتىرعانى دا سول.

“The Qazaq Times”