اقش رەسەيگە قارسى جاڭا قارار قابىلدادى

اقش وكىلدەر پالاتاسى رەسەي اگرەسسيالىق ساياساتىن توقتاتپايىنشا، «ۇلكەن جەتىلىك» سامميتىنە مۇشە بولمايتىنىن مالىمدەدى.  وسىعان بايلانىستى قابىلدانعان جاڭا قارارعا ەكى پارتيانىڭ 339 كونگرەسسمەنى قولداپ، ال 71 رەسپۋبليكاشى قارسى قول قويعان. اتالعان قۇجات زاڭ شىعارۋشى ورگاننىڭ تومەنگى پالاتاسىنىڭ سايتىندا جاريالاندى.

قاراردا «وكىلدەر پالاتاسى رەسەيدىڭ ۋكرايناداعى اگرەسسيالىق ءىس-ارەكەتتەرىن قوسا العاندا، قىرىمدى اننەكسيالاپ الۋى جانە حاڭسىز تۇردە جالعاسىپ جاتقان تۇراقسىزداندىرۋ ارەكەتتەرىن اشىق ايىپتايدى. ءوز كورشىلەرىنىڭ اۋماقتىق تۇتاستىعىن قۇرمەتتەمەيىنشە جانە دەموكراتيا ستاندارتتارىن ۇستانعانعا دەيىن رەسەي فەدەراتسياسى سامميت قۇرامىنا كىرمەيدى» دەپ جازىلعان. قۇجاتتا باتىس ەلدەرى ۋكرايناداعى جاعداي ءۇشىن رەسەي بيلىگىن كەزەكتى رەت سىنعا العان.

رف پرەزيدەنتىنىڭ ءباسپاسوز حاتشىسى دميتري پەسكوۆ جۋرناليستەرگە: «رەسەي ءۇشىن G8 فورماتىنا ورالۋ ماقسات ەمەس، سەبەبى كوپتەگەن ماسەلەلەردى G20 فورماتىندا شەشۋ ءتيىمدى. سونىمەن قاتار، رەسەيلىك كوشباسشى ۆلاديمير پۋتين باسقا ەلدەرمەن كەز كەلگەن فورماتتاعى قارىم-قاتىناستان باس تارتپايدى»، – دەدى.

«ۇلكەن جەتىلىك» توبى– ۇلىبريتانيا، گەرمانيا، يتاليا، كانادا، اقش، فرانتسيا جانە جاپونيا كىرەتىن ەكونوميكالىق دامىعان ەلدەردىڭ بىرلەستىگى. G7 فورماتىنىڭ كەزدەسۋى 1976 جىلدان 1997 جىلعا دەيىن بولعان. رەسەي بۇل توپ قۇرامىنا ەنگەننەن كەيىن ول G8 دەپ اتالدى. 2014 جىلدىڭ ناۋرىزدا ۋكرايناداعى قاقتىعىستار، اقش پەن ەۋروپانىڭ رەسەيمەن قارىم-قاتىناسى داعدارىسقا ۇشىراعاننان كەيىن، بىرلەستىك قاتىسۋشىلارى رەسەيدى قۇرامىنان شىعاردى.

رەسەي 2014 جىلى ناۋرىزدا قىرىمدى اننەكسيالاعان. ماسكەۋدىڭ بۇل ارەكەتىنە ۋكراينا، اقش جانە ەۋروپالىق وداق قۇرامىنداعى مەملەكەتتەر قارسىلىق ءبىلدىرىپ، رەسەيدى «اگرەسسيالىق ساياسات ۇستاناتىن مەملەكەت» دەپ اتاعان. ءالى كۇنگە دەيىن اقش، ەو، تۇركيا، ۋكراينا قىرىمدى رەسەي جەرى رەتىندە مويىندامايدى.

"The Qazaq Times"