اقش  وكىلدەر پالاتاسىنىڭ سپيكەرى نەنسي پەلوسي شىعىس  ازيانىڭ بىرنەشە ەلىنە بارۋدى جوسپارلاعان. بۇگىن پەلوسي سينگاپۋر استاناسىندا ەل پرەزيدەنتى  حاليما ياكوبتىڭ قابىلداۋىندا بولىپ ودان سوڭ پرەمەر-مينيسترىمەن جانە سىرتقى ىستەر مينيستىرىمەن كەزدەستى. الدا مالايزيا، وڭتۇستىك كورەيا جانە جاپونياعا ساپارلايتىنى ايتىلعان. سونىمەن بىرگە ساراپشىلاردىڭ پىكىرىنشە اقش لاۋازىمدىسى قىتايدىڭ گەو ساياساتىنداعى ەڭ ءبىر جاندى جەرىنە اينالعان تايۆانعا دا بارۋى مۇمكىن.

الايدا، ول تۋرالى  رەسمي اقپارات جوق. تايۆانعا سوڭعى رەت 1997 جىلى  رەسپۋبليكاشىل نيۋت گينگريچ كەلگەن  سوڭ كەيىنگى 25 جىلدا اقش-تىڭ بىردە-ءبىر جوعارى لاۋازىمدى شەنەۋنىگى بارماعان.

قىتاي بيلىگى تايۆاننىڭ دەربەستىگىنەن ءۇزىلدى-كەسىلدە باس تارتادى. سىرتپەن قارىم-قاناستىڭ بارلىعىندا وسى ماسەلەگە باسا ءمان بەرەدى. تايۆاندى ءوزىنىڭ ءبىر پروۆينتسياسى رەتىندە قاراستىرادى جانە ونى باسقا ەلدىڭدە مويىنداۋىن تالاپ ەتەدى. ال بۇعازداعى ەل وزدەرىنىڭ دەربەستىگىن ۇنەمى ايتىپ كەلەدى. بۇنى اقش باستاعان ءبىر قاتار دەموكراتيالى ەلدەردە قولدايدى. وسى سەبەپتى دە قىتاي بيلىگى تايۆان قىتاي بيلىگىن مويىنداماسا بولاشاقتا كۇش قولداناتىنىن ايتىپ كۇش كورسەتۋگە دايىن ەكەندىگىن جاسىرمايدى.

پەلوسي حانىم تۆيتتەردە التى ادامنان تۇراتىن  دەلەگاتسياسىنىڭ  ساپارى "امەريكانىڭ ايماقتاعى وداقتاستارىمىز بەن دوستارىمىزعا دەگەن مىزعىماس ادالدىعىن كورسەتەدى " دەپ جازدى. ونىڭ كەڭسەسى جەكسەنبى كۇنگى مالىمدەمەسىندە بۇل ساپار «ءۇندى-تىنىق مۇحيتى ايماعىنداعى ءوزارا قاۋىپسىزدىك، ەكونوميكالىق سەرىكتەستىك جانە دەموكراتيالىق باسقارۋعا باعىتتالعان» دەيدى.  اقش-تىڭ تايۆانمەن ەمەس، قىتايمەن رەسمي ديپلوماتيالىق بايلانىسى بولعاندىقتان، نەنسي حانىمنىڭ دەلەگاتسياسى تايۆانعا بارسا، اقش پەن قىتاي قارىم-قاتىناسىنا سىزات ءتۇسۋى مۇمكىن. پەلوسي حانىم ۇزاق ۋاقىت بويى قىتاي بيلىگىن  سىناپ كەلەدى، قىتايدا  ادام قۇقىقتارىنىڭ ءجيى بۇزىلاتىندىعىمەن ايىپتايدى. ول بۇرىن  دەموكراتيانى جاقتايتىن ديسسيدەنتتەرمەن كەزدەسىپ، 1989 جىلعى قىرعىن قۇرباندارىن ەسكە الۋ ءۇشىن تيان-انمىن الاڭىندا بولعان. وسىدان ءبىراز بۇرىن ول «تايۆانعا قولداۋ كورسەتۋ ءبىز ءۇشىن ماڭىزدى» دەگەن بولاتىن. نەنسي پەلوسي حانىممەن بىرلىكتە  وكىلدەر پالاتاسىنىڭ جەتەكشى مۇشەلەرى: گريگوري ميكس، مارك تاكانو، سيۋزان دەلبەنە، رادجا كريشناموورتي جانە ەندي كيم بولادى. ولاردىڭ كەلىسسوزدەرى ساۋدا، كليماتتىق داعدارىس جانە ادام قۇقىقتارى ماسەلەلەرىن  قامتيدى دەپ كۇتىلۋدە.

الدا الەمنىڭ الپاۋىت ەكى ەلىنىڭ اراسىندا سوعىس وتىن تۇتاندىرىپ جىبەرۋى مۇمكىن سانالاتىن  سپيكەر نەنسي پەلوسيدىڭ تايۆانعا ساپارىنىڭ بولۋ بولماۋىن الەمدىك اقپارات ءتورت كوزىمەن كۇتىپ وتىر.

The Qazaq Times