بايدەن مەن پۋتين اراسىنداعى بەينە سامميت ەرتەڭ (7 جەلتوقسان) كەشتە وتەدى. فوتو: The Statesman

اقش پرەزيدەنتى جو بايدەن مەن رف پرەزيدەنتى ۆلاديمير پۋتين اقش-رەسەي قارىم-قاتىناسىنداعى پروبلەمالارىن جانە ۋكراينا ماسەلەسىن تالقىلاۋ ءۇشىن بەينە-كونفەرەنتسيا وتكىزبەك. اق ءۇيدىڭ ءباسپاسوز قىزمەتى كەزدەسۋدىڭ 7 جەلتوقسان كۇنى وتەتىنىن مالىمدەدى.

اق ءۇي ءباسپاسوز وكىلى جەن پساكي سوزىندە: «كوشباسشىلار اقش-رەسەي قارىم-قاتىناسىنداعى كەڭ اۋقىمدى ماسەلەلەردى، سونىڭ ىشىندە ستراتەگيالىق تۇراقتىلىق، كيبەر جانە ايماقتىق ماسەلەلەردى تالقىلايدى. پرەزيدەنت بايدەن تالقىدا رەسەيدىڭ ۋكراينا شەكاراسىنداعى اسكەري ارەكەتتەرىنە قاتىستى اقش-تىڭ الاڭداۋشىلىعىن دا جەتكىزىپ، ۋكراينا ەگەمەندىگى مەن تەرريتوريالىق تۇتاستىعىن قولدايتىنىن ايتادى»، – دەگەن.

ءپۋتيننىڭ ءباسپاسوز وكىلى پەسكوۆ تا كەزدەسۋ تۋرالى Interfax اگەنتتىگىنە راستاعان. ول كەزدەسۋدىڭ سەيسەنبى كۇنى كەشتە بولاتىنىن ايتقان.

ماسكەۋ سوڭعى ۋاقىتتا ۋكراينا شەكاراسىنا جاقىن اۋماقتا اۋىر قول جيناپ، اسكەري تەحنيكالاردى توپتاستىرىپ وتىر. رەسەيدىڭ بۇل ارەكەتى ۋكراينا عانا ەمەس، ەۋروپا ەلدەرىمەن قاتار اقش-تى دا الاڭداتتى. بايدەن وتكەن جۇمادا جۋرناليستەرگە بەرگەن جاۋابىندا رەسەيگە جاۋاپ رەتىندە بىرقاتار جوسپارلاردى جاساپ وتىرعانىن ايتقان ەدى.

ناتو مۇشەلەرى دە جاعدايعا قاتىستى مازاسىز كۇيدە. وسى اپتادا اليانس مۇشەلەرىنىڭ ءسىم باسشىلارى كەزدەسىپ رەسەيدىڭ قاۋىپتى ارەكەتىن تالقىلايدى. ۇيىمنىڭ باس حاتشىسى ستولتەنبەرگ رەسەيگە ەسكەرتۋ جاساپ، قاۋىپتى قادام رەسەيگە زور شىعىن اكەلەتىنىن ايتقان.

ال، اقش شەنەۋنىكتەرى رەسەي ۋكراينانى اۋقىمدى باسىپ الۋعا ۇرىنسا تۇتاستاي قارجىلىق مۇمكىندىگىن كەسىپ تاستاۋدىڭ جوسپارلارىن اقىلداسۋدا.

The Qazaq Times