AQŞ Reseyge qarsı jaña qarar qabıldadı

AQŞ Ökilder palatası Resey agressiyalıq sayasatın toqtatpayınşa, «Ülken jetilik» sammitine müşe bolmaytının mälimdedi.  Osığan baylanıstı qabıldanğan jaña qararğa eki partiyanıñ 339 kongressmeni qoldap, al 71 respublikaşı qarsı qol qoyğan. Atalğan qwjat zañ şığaruşı organnıñ tömengi palatasınıñ saytında jariyalandı.

Qararda «Ökilder palatası Reseydiñ Ukrainadağı agressiyalıq is-äreketterin qosa alğanda, Qırımdı anneksiyalap aluı jäne hañsız türde jalğasıp jatqan twraqsızdandıru äreketterin aşıq ayıptaydı. Öz körşileriniñ aumaqtıq twtastığın qwrmettemeyinşe jäne demokratiya standarttarın wstanğanğa deyin Resey Federaciyası sammit qwramına kirmeydi» dep jazılğan. Qwjatta Batıs elderi Ukrainadağı jağday üşin Resey biligin kezekti ret sınğa alğan.

RF prezidentiniñ baspasöz hatşısı Dmitriy Peskov jurnalisterge: «Resey üşin G8 formatına oralu maqsat emes, sebebi köptegen mäselelerdi G20 formatında şeşu tiimdi. Sonımen qatar, reseylik köşbasşı Vladimir Putin basqa eldermen kez kelgen formattağı qarım-qatınastan bas tartpaydı», – dedi.

«Ülken jetilik» tobı– Wlıbritaniya, Germaniya, Italiya, Kanada, AQŞ, Franciya jäne Japoniya kiretin ekonomikalıq damığan elderdiñ birlestigi. G7 formatınıñ kezdesui 1976 jıldan 1997 jılğa deyin bolğan. Resey bwl top qwramına engennen keyin ol G8 dep ataldı. 2014 jıldıñ naurızda Ukrainadağı qaqtığıstar, AQŞ pen Europanıñ Reseymen qarım-qatınası dağdarısqa wşırağannan keyin, birlestik qatısuşıları Reseydi qwramınan şığardı.

Resey 2014 jılı naurızda Qırımdı anneksiyalağan. Mäskeudiñ bwl äreketine Ukraina, AQŞ jäne Europalıq odaq qwramındağı memleketter qarsılıq bildirip, Reseydi «agressiyalıq sayasat wstanatın memleket» dep atağan. Äli künge deyin AQŞ, EO, Türkiya, Ukraina Qırımdı Resey jeri retinde moyındamaydı.

"The Qazaq Times"