الماتى قالالىق ءبىلىم باسقارماسىنىڭ باسشىسى گۇلنار قوجابەرگەنوۆا ماحاقىزى. فوتو: اشىق دەرەككوز

«وقۋ قۇرالدارى بارلىعىنا بەرىلەدى» دەپ مالىمدەگەن الماتى قالالىق ءبىلىم باسقارماسىنىڭ باسشىسى گۇلنار قوجابەرگەنوۆا ەندى اتا-انالار مەكتەپتەردە جەتىسپەيتىن وقۋلىقتاردى وزدەرى ساتىپ الۋى ءتيىس ەكەنىن ايتتى.  

ءبىزدىڭ بىلۋىمىزشە، قازىرگى تاڭدا الماتى شاھارىندا مەملەكەتكە قارايتىن 185 بالاباقشا، 204 مەكتەپ جانە  22 كوللەدج بار.

«وقۋلىقتار ەسەپتەلگەن كونتينگەنتكە ساتىلىپ الىنادى. الماتىدا 244 مىڭ وقۋشى بار. بيىل وقۋشىلار سانى تاعى 17 مىڭعا ارتتى. ءبىز مۇنى الدىن الا جوسپارلاي المايمىز. ياعني، بالالاردىڭ كەيبىرىنە جەتپەۋى مۇمكىن. وندا اتا-انالار وزدەرى ساتىپ الۋى كەرەك. ءبىر جاعىنان ولاردىڭ دا جاۋاپكەرشىلىگى بولۋى ءتيىس. 1-2 كىتاپ ساتىپ السا، ەشتەڭە ەتپەيدى», – دەدى باسقارما باسشىسى.

ونىڭ ايتۋىنشا، جىلدا الماتىداعى وقۋشىلار سانى 10 پايىزعا ارتادى. وسى وقۋ جىلىنىڭ وزىندە وقۋشىلاردىڭ سانى 261 013 جەتتى. تاعى دا 30 مىڭعا جۋىق وقۋشى ورنى تاپشى بولىپ وتىر دەسەدى.

ءبىر قىزىعى، تامىزدىڭ 12-ءسى وتكەن جاڭا وقۋ جىلىنا دايىندىق تۋرالى بريفينگتە باسقارما باسشىسى گۇلنار ماحاقىزى  2019-2020 وقۋ جىلىندا «1-11 سىنىپتارعا 258 مىڭنان استام وقۋشى كەلەدى دەپ كۇتىلۋدە. الدىن الا جاسالعان بولجام بويىنشا ءبىرىنشى كلاسستىقتار كونتينگەنتى 32 مىڭ وقۋشىنى قۇراپ وتىر», – دەگەن ەدى.

سول جيىندا مەكتەپتەردىڭ بارلىق وقۋشىلارىنا وقۋ قۇرالدارى بەرىلىپ، 20 تامىزعا دەيىن جەتكىزىلەتىنىن، 5 شىلدە مەن 30 قىركۇيەك اراسىندا ءۇش ايعا جۋىق «مەكتەپكە جول» اكتسياسى جۇرەتىنىن مالىمدەگەن بولاتىن. بىراق «بارلىق وقۋشىعا بەرىلەتىنىن» حابارلاعان باسقارما باسشىسى ەندى اتا-انالاردىڭ دا «جاۋاپكەرشىلىگى بولۋى ءتيىس، 1-2 كىتاپ ساتىپ السا، ەشتەڭە ەتپەيدى» دەپ باسقاشا ءوڭ تانىتۋى قوعامنىڭ قىزۋ تالقىسىنا تۇسۋدە. كوپبالالى وتباسىلار قايتپەك سوندا، بەس بالاسى بارلار ون كىتاپ ساتىپ السا، كەمىندە ون مىڭنان اساتىنىن انىق. جاڭا وقۋ جىلىنىڭ باستالۋىنا ەكى اپتا قالعاندا قولداعى ەسەپتە 258 مىڭ وقۋشى دەپ، الايدا فاكت بويىنشا 261 مىڭ وقۋشى كەلەتىن نەندەي زەرتتەۋ جۇمىستارى. ايىرماشىلىق – 3000 وقۋشى. 6 بىردەي ورتا مەكتەپتىڭ وقۋشىسىنا تەڭ قيساپتان جاي عانا قاتەلەسۋ مۇمكىن بە دەگەن ساۋال تۋادى. مەكتەپ تابالدىرىعىن العاش اتتايتىن وقۋشىلار ءتىزىمىن ءتۇزۋدىڭ جۇيەلى، اۆتوماتتاندىرىلعان الگوريتمى جوق بولعانى ما سوندا؟ الماتىدا ءومىر ءسۇرۋ ستاندارتتارىنىڭ شىعىنى الدەقايدا كوپ، وقۋ قۇرالدارىنىڭ جەتىسپەۋى كوبىنە قازاق مەكتەپتەرىنە ءتان ماسەلە ەكەنىن ەسكەرسەك، مادەنيەت پەن اعارتۋشىلىق ورداسى سانالاتىن ءبىلىم باسشىلىعى جاۋاپتى ورگانداردىڭ سالعىرتتىعىن اتا-انالاردىڭ «جاۋاپكەرشىلىگىنە ىسىرىپ» قويا سالۋ تىعىرىقتان شىعار جول ەمەس.

ءبىلىم سالاسىنداعى مەملەكەتتىك ساياسات قاعيداسىن ەسكەرسەك، ەلىمىزدە جۇرگىزىلىپ جاتقان الەۋمەتتىك ساياساتتى ىلگەرىلەتۋ جوباسى اياسىنداعى «باقۋاتتى قوعام: ونجىلدىقتىڭ 10 ماقساتى» باعدارلاماسى بويىنشا مەملەكەتتىك وقۋ ورىندارى ءوز كونتينگەنتىن ءبىلىم بەرۋمەن قاتار، نەگىزگى وقۋلىقتارمەن تولىق قامتۋى ءتيىس. ەڭ باستىسى «ءبىلىم تۋرالى» زاڭنىڭ 7-بابىندا كورسەتىلگەندەي ءبىلىم بەرۋ جۇيەسىنىڭ «ساپالى ءبىلىم الۋ ءۇشىن قاجەتتى جاعدايلار جاساۋ»  مىندەتىن نەگىزگى قاعيدا رەتىندە كۇن تارتىبىنە ەنگىزگەن ءلازىم. ايتپەگەندە تۇرمىستىق اۋىرتپالىق بالانىڭ تۇلعالىق قالىپتاسۋىندا كەسىرىن تيگىزۋى مۇمكىن.

"The Qazaq Times"