«Oqu qwraldarı barlığına beriledi» dep mälimdegen Almatı qalalıq Bilim basqarmasınıñ basşısı Gülnär Qojabergenova endi ata-analar mektepterde jetispeytin oqulıqtardı özderi satıp aluı tiis ekenin ayttı.  

Bizdiñ biluimizşe, qazirgi tañda Almatı şaharında memleketke qaraytın 185 balabaqşa, 204 mektep jäne  22 kolledj bar.

«Oqulıqtar eseptelgen kontingentke satılıp alınadı. Almatıda 244 mıñ oquşı bar. Biıl oquşılar sanı tağı 17 mıñğa arttı. Biz mwnı aldın ala josparlay almaymız. YAğni, balalardıñ keybirine jetpeui mümkin. Onda ata-analar özderi satıp aluı kerek. Bir jağınan olardıñ da jauapkerşiligi boluı tiis. 1-2 kitap satıp alsa, eşteñe etpeydi», – dedi basqarma basşısı.

Onıñ aytuınşa, jılda Almatıdağı oquşılar sanı 10 payızğa artadı. Osı oqu jılınıñ özinde oquşılardıñ sanı 261 013 jetti. Tağı da 30 mıñğa juıq oquşı ornı tapşı bolıp otır desedi.

Bir qızığı, tamızdıñ 12-si ötken jaña oqu jılına dayındıq turalı brifingte basqarma basşısı Gülnär Mahaqızı  2019-2020 oqu jılında «1-11 sınıptarğa 258 mıñnan astam oquşı keledi dep kütilude. Aldın ala jasalğan boljam boyınşa birinşi klasstıqtar kontingenti 32 mıñ oquşını qwrap otır», – degen edi.

Sol jiında mektepterdiñ barlıq oquşılarına oqu qwraldarı berilip, 20 tamızğa deyin jetkiziletinin, 5 şilde men 30 qırküyek arasında üş ayğa juıq «Mektepke jol» akciyası jüretinin mälimdegen bolatın. Biraq «barlıq oquşığa beriletinin» habarlağan basqarma basşısı endi ata-analardıñ da «jauapkerşiligi boluı tiis, 1-2 kitap satıp alsa, eşteñe etpeydi» dep basqaşa öñ tanıtuı qoğamnıñ qızu talqısına tüsude. Köpbalalı otbasılar qaytpek sonda, bes balası barlar on kitap satıp alsa, keminde on mıñnan asatının anıq. Jaña oqu jılınıñ bastaluına eki apta qalğanda qoldağı esepte 258 mıñ oquşı dep, alayda fakt boyınşa 261 mıñ oquşı keletin nendey zertteu jwmıstarı. Ayırmaşılıq – 3000 oquşı. 6 birdey orta mekteptiñ oquşısına teñ qisaptan jay ğana qatelesu mümkin be degen saual tuadı. Mektep tabaldırığın alğaş attaytın oquşılar tizimin tüzudiñ jüyeli, avtomattandırılğan algoritmi joq bolğanı ma sonda? Almatıda ömir süru standarttarınıñ şığını äldeqayda köp, oqu qwraldarınıñ jetispeui köbine qazaq mektepterine tän mäsele ekenin eskersek, mädeniet pen ağartuşılıq ordası sanalatın bilim basşılığı jauaptı organdardıñ salğırttığın ata-analardıñ «jauapkerşiligine ısırıp» qoya salu tığırıqtan şığar jol emes.

Bilim salasındağı memlekettik sayasat qağidasın eskersek, elimizde jürgizilip jatqan äleumettik sayasattı ilgeriletu jobası ayasındağı «Baquattı qoğam: onjıldıqtıñ 10 maqsatı» bağdarlaması boyınşa memlekettik oqu orındarı öz kontingentin bilim berumen qatar, negizgi oqulıqtarmen tolıq qamtuı tiis. Eñ bastısı «Bilim turalı» zañnıñ 7-babında körsetilgendey bilim beru jüyesiniñ «sapalı bilim alu üşin qajetti jağdaylar jasau»  mindetin negizgi qağida retinde kün tärtibine engizgen läzim. Äytpegende twrmıstıq auırtpalıq balanıñ twlğalıq qalıptasuında kesirin tigizui mümkin.

"The Qazaq Times"