يراننىڭ ساۋىتتى تانكتەر قوسىنى. فوتو: Iranian military forces

يران قارۋلى كۇشتەرى باس شتاب قولباسشىسى مۇحامماد باكەري ءبىراتار ايماقتاعى اسكەري قوسىنداردى اۋە، تەڭىز كۇشتەرىن ارالاپ كوردى جانە ساپارىنان كەيىن يران اسكەري كۇشتەرى قاتەرگە توتەپ بەرۋگە دايىن دەگەن مالىمدەمە جاسادى.

دەزفۋلدەگى اسكەري-اۋە كۇشتەرى مەن ساۋىتتى تانكتەر قوسىنىن ارالاعان باكەري يران قارۋلى كۇشتەرى وزدەرىنە قارسى قانداي دا ءبىر شابۋىلدى جاۋاپسىز قالدىرمايتىنىن ايتتى. گيبرالتار جاعالاۋىنداعى يران تانكەرىن ۇستاعان بريتانيا تەڭىز كۇشتەرىنىڭ ارەكەتىن «قاراقشىلىق» دەپ باعالاعان ول: «يران قاشاندا تەڭىز قاراقشىلارىمەن قاتاڭ كۇرەس جۇرگىزىپ كەلەدى. سوندىقتان، بريتانيالىق تەڭىز كۇشتەرىنىڭ ارەكەتى جاۋاپسىز قالمايدى»، – دەگەن.

يران اسكەري قۋاتى تۋرالى مالىمەتتەردى جيناقتاپ كورسەك، سوڭعى جىلدارى ير قورعانىس قۋاتىنا باسا نازار اۋدارعانى بايقالادى. ير قارۋلى كۇشتەرى سول ايماقتاعى الدىنعى قاتارداعى قۋاتتى كۇشتەردىڭ ءبىرى بولىپ سانالادى. سالىستىرمالى تۇردە مولىنان قارجىلاندىرىلعان ساۋد ارابياسىنىڭ اسكەري قۋاتىنان دا باسىمىراق. سوڭعى جىلدارداعى ورتا شىعىس جاعدايى يران قورعانىس قۋاتىن ستراتەگيالىق دەڭگەيگە كوتەرىپ، قورعانۋدان شابۋىل جاساۋعا قاراي دامىتقان.

Brookings كورسەتكەن مالىمەتتەرگە قاراعاندا، يراندا ورتا قاشىقتىققا اتىلاتىن زىمىرانداردان 15 ءتۇرى بار. بۇلار 200 شاقىرىمنان 6 مىڭ شاقىرىمعا دەيىن ۇشىپ بارا الادى. يراننىڭ قورعانى قۋاتى پارسى شىعاناعىندا باسىمدىق تانىتا الادى. سەبەبى، تەڭىز جاعالاۋلارىندا شىعاناقتى باقىلاۋعا ارنالعان زىمىران قوندىرعىلارى بار.

الايدا، قۇراما شتاتتىڭ وڭىردەگى اسكەري بازالارى يرانعا جاقىن اۋماقتاردا ورنالاسقان. ونىڭ ۇستىنە ءۇندى-تىنىق مۇحيت ايماعىنداعى اسكەري كۇشتەرىن يرانعا قارسى شوعىرلاندىرا الادى. اقش اسكەري تەڭىز جانە اۋە كۇشتەرىنە قارسى تۇرۋ يران ءۇشىن وڭاي بولمايدى.

“The Qazaq Times”