Irannıñ sauıttı tankter qosını. Foto: Iranian military forces

Iran Qarulı küşteri Bas ştab qolbasşısı Mwhammad Bakeri biratar aymaqtağı äskeri qosındardı äue, teñiz küşterin aralap kördi jäne saparınan keyin Iran äskeri küşteri qaterge tötep beruge dayın degen mälimdeme jasadı.

Dezfuldegi äskeri-äue küşteri men sauıttı tankter qosının aralağan Bakeri Iran qarulı küşteri özderine qarsı qanday da bir şabuıldı jauapsız qaldırmaytının ayttı. Gibraltar jağalauındağı Iran tankerin wstağan Britaniya teñiz küşteriniñ äreketin «qaraqşılıq» dep bağalağan ol: «Iran qaşanda teñiz qaraqşılarımen qatañ küres jürgizip keledi. Sondıqtan, britaniyalıq teñiz küşteriniñ äreketi jauapsız qalmaydı», – degen.

Iran äskeri quatı turalı mälimetterdi jinaqtap körsek, soñğı jıldarı IIR qorğanıs quatına basa nazar audarğanı bayqaladı. IIR qarulı küşteri sol aymaqtağı aldınğı qatardağı quattı küşterdiñ biri bolıp sanaladı. Salıstırmalı türde molınan qarjılandırılğan Saud Arabiyasınıñ äskeri quatınan da basımıraq. Soñğı jıldardağı Orta Şığıs jağdayı Iran qorğanıs quatın strategiyalıq deñgeyge köterip, qorğanudan şabuıl jasauğa qaray damıtqan.

Brookings körsetken mälimetterge qarağanda, Iranda orta qaşıqtıqqa atılatın zımırandardan 15 türi bar. Bwlar 200 şaqırımnan 6 mıñ şaqırımğa deyin wşıp bara aladı. Irannıñ qorğanı quatı Parsı şığanağında basımdıq tanıta aladı. Sebebi, teñiz jağalaularında şığanaqtı baqılauğa arnalğan zımıran qondırğıları bar.

Alayda, Qwrama Ştattıñ öñirdegi äskeri bazaları Iranğa jaqın aumaqtarda ornalasqan. Onıñ üstine Ündi-Tınıq mwhit aymağındağı äskeri küşterin Iranğa qarsı şoğırlandıra aladı. AQŞ äskeri teñiz jäne äue küşterine qarsı twru Iran üşin oñay bolmaydı.

“The Qazaq Times”