كوپبالالى انالاردىڭ ماسەلەسى ۆەنگر مەن قازاق ۇكىمەتىنىڭ پارقىن كورسەتتى

قازاقستان دەموگرافيادا تسيفرعا عانا جۇگىنسە، ۆەنگريا بۇل ماسەلەدە ارقاشان سەرگەك ويلايدى. وعان ۆەنگريا پرەمەر-ءمينيسترى ۆيكتور وربان ەلدەگى تۋ كورسەتكىشىن كوتەرۋ اياسىندا كوپبالالى وتباسىلارعا سالىقتار مەن قارىز جەڭىلدىكتەرىن جاريا ەتۋ ساتىندەگى مىنا ءبىر ءسوزى دالەل بولسا كەرەك.

اۋەلى ەۋروپانىڭ تۋ كورسەتكىشىنىڭ قۇلدىراۋ ماسەلەسىن شەشۋدە كوشى-قونعا كوپ جۇگىنەتىن اتاپ وتكەن  ۆيكتور وربان: «ال ۆەنگرلەر باسقاشا ويلايدى. بىزگە ءتسيفردىڭ قاجەتى جوق. بىزگە ۆەنگر بالالار قاجەت»، – دەپ مالىمدەدى.

وسىلايشا، ۆەنگريا تۋ تۋرالى كورسەتكىشىن كوتەرۋ ماقساتىندا ەكى بالادان كوپ وتباسىلارعا كەڭەيتىلگەن كرەديت باعدارلامالارىن ۇسىنۋدى جوسپارلاعان. دالىرەك ايتساق، بۇل كرەديتكە جانۇيالار باسپانا الا الادى، سونمەن بىرگە، ولارعا اۆتوكولىك ساتىپ الۋعا سۋبسيديا دا بەرىلەتىنى دە ءمالىم.

ول – ول ما، ۇلتتىق نەگىزدە دامۋدى ماقسات تۇتقان بۇل ەلدە كەمىندە ءتورت بالا اسىراپ وتىرعان ايەلدەردى تابىس سالىعىنان بوساتۋ جوسپارلانۋدا.

قازاقستاندىق انالار ءۇشىن ۆەنگريا پرەمەرى ايتقان كەلەسى پىكىر ءتىپتى سۇيكىمدى ەستىلمەسە، قانەكي:

40-قا دەيىنگى ايەلدەر ءبىرىنشى رەت تۇرمىسقا شىعىپ جاتسا 36 مىڭ دوللار كولەمىندە سۋبسيديالانعان كرەديت بەرىلەدى. ال سول ايەل ەكىنشى بالا بوسانسا، ونىڭ ۇشتەن ءبىرى، ياعني 12 مىڭ دوللارى كەشىرىلەدى ەكەن. ال ءۇشىنشى بالا بوسانا سالىسىمەن كرەديت تولىعىمەن جابىلادى.

قىسقاسى، ەل ۇكىمەتى 2019 جىل بيۋدجەتىنىڭ جالپى رەزەرۆتەرىنەن نەمەسە قوسىمشا تابىستارىنان جاڭا الەۋمەتتىك باعدارلاماعا قاراجات ءبولۋدى جوسپارلاپ وتىر.

ەندى قازاقستانداعى جاعدايدى ويلاپ كورىڭىز. ايدىڭ-كۇننىڭ امانىندا الەۋمەتتىك جاعدايدىڭ اۋىرتپاشىلىعى – ءتورت كرەديت بەس بالانىڭ تاعدىرىن وتقا ورادى ەمەس پە؟ وسىنداي قايعىلى وقيعادان سوڭ دا كوپ بالالى انا تاقىرىبىن قاقپاقىلعا سالىپ، جەڭىلدىك بەرۋدىڭ ءادىس-ءتاسىلىن ءالى شەشىپ جەتپەگەن ۇكىمەتكە نە ايتۋعا بولادى؟ مۇمكىن، ءبىزدىڭ بيلىك تە ءتۇبى تۇركى توپىراعىنان بارعان تەگى تىندەس ۆەنگرلەردەن ۇلگى الۋى كەرەك پە ەدى، كىم ءبىلىپتى؟!

"The Qazaq Times"