ءدىن سالاسىنداعى مەملەكەتتىك ساياسات تۋرالى تۇجىرىمداما بەكىتىلدى

مەملەكەت باسشىسى ن.ءا.نازارباەۆ قازاقستان رەسپۋبليكاسىنىڭ 2017-2020 جىلدارعا ارنالعان ءدىن سالاسىنداعى مەملەكەتتىك ساياسات تۋرالى تۇجىرىمداماسىن بەكىتىپ، ۇكىمەتكە قابىلدانعان قۇجاتتى جۇزەگە اسىرۋ بويىنشا ءۇش ايلىق مەرزىمگە ءىس-شارالار جوسپارىن قۇرۋدى تاپسىردى.

تۇجىرىمدامانىڭ ماقساتى - ەلىمىزدىڭ دامۋىنىڭ زايىرلى قاعيداتىن قامتاماسىز ەتۋ جانە نىعايتۋ، ازاماتتاردىڭ ار-وجدان بوستاندىعىن كەپىلدەندىرۋ، ولاردىڭ ءدىندى تاڭداي الۋ نەمەسە دىننەن باس تارتا الۋ ەركىندىگىنە جول اشۋ.

ءدىن سالاسىنداعى مەملەكەتتىك ساياساتتى ۇتىمدى جۇزەگە اسىرۋ ءۇشىن ۇكىمەت پەن ازاماتتىق قوعام وكىلدەرىنىڭ ارىپتەستىگىن ارتتىرۋ، ازاماتتاردى ءدىني ساۋاتتىلىعىن جوعارىلاتۋ، اقپاراتتىق قىزمەتتى كۇشەيتۋ، دەسترۋكتيۆتى اعىمداردىڭ جۇمىسىنا توسقاۋىل قويۋ  - ۇكىمەت جاسايتىن جوسپارعا ەنەتىن شارالاردىڭ نەگىزگى باعىتتارى.

بۇگىندە ەلىمىزدە 18 كونفەسسيا مەن 3658 ءدىني بىرلەستىك تىركەلگەن. سونداي-اق قازاقستاندا 2550 مەشىت، 294 پراۆوسلاۆ جانە 109 كاتوليك شىركەۋلەرى، 495 پروتەستانت، 2 بۋددا عيباداتحاناسى، 7 يۋدەي سيناگوگاسى مەن كريشنا جانە باحاي قاۋىمداستىقتارىنىڭ 7 قۇلشىلىق ۇيلەرى جۇمىس ىستەيدى.

“The Qazaq Times”