ەردوعان ۆەنگريا پرەزيدەنتى يانوش ادەرمەن كەزدەستى. فوتو: انادولى.

تۇركيا پرەزيدەنتى رەجەپ تايىپ ەردوعان تۇرىك بيلىگىنىڭ دەلەگاتسياسىن باستاپ ۆەنگرياعا جاساعان ساپارى اياقتالدى. كەزەكتى ساپاردا ەردوعان ۆەنگريا پرەزيدەنتى يانوش ادەر، پرەمەر-مينيستر ۆيكتور وربان جانە پارلامەنت باسشىسىمەن جەكەلەگەن كەزدەسۋلەر وتكىزدى. سونداي-اق، تۇرىك بيلىگىنىڭ دەلەگاتسياسى مەن ۆەنگريا ۇكىمەتىنىڭ وكىلدەرى كەڭەيتىلگەن وتىرىستار وتكىزدى.  بۇل تۋرالى تۇركيانىڭ «انادولى» اقپاراتتىق اگەنتتىگى حابارلادى.

تۇركيا-ۆەنگريا اراسىنداعى ديالوگتا ەكى ەلدىڭ قارىم-قاتىناسىن جوعارى دەڭگەيگە كوتەرۋ ماسەلەلەرى قولعا الىنعان جانە ۇكىمەتتەر اراسىندا بىرقاتار جاڭا كەلىسىمدەر جاسالعان.

ەكى ەل اراسىندا كەڭەيتىلگەن وتىرىس وتكىزىلدى. فوتو: انادولى.

پرەمەر-مينيستر ۆيكتور وربانمەن بولعان كەزدەسۋدەن كەيىن بىرلەسكەن ءباسپاسوز جيىنىن وتكىزدى. ساپار كەزىندە ەردوعان تۇركيانىڭ ەۋروپا وداعىنا دەگەن ۇمتىلىسىندا ۆەنگريانىڭ تاباندى قولداۋ كورسەتكەنىنە العىسىن ءبىلدىردى. وربان مالىمدەمەسىندە: «ەكى ەل اراسىنداعى بايلانىس وتە جوعارى دەڭگەيدە. ۆەنگريانىڭ قاۋىپسىزدىگى تۇركيامەن تىكەلەي بايلانىستى. تۇركيادا تۇراقتىلىقتىڭ بولۋى ءبىزدىڭ دە قاۋىپسىزدىگىمىز بەن تۇراقتىلىعىمىزدى قامتاماسىز ەتەدى. اسىرەسە، بوسقىندار ماسەلەسىندە تۇركيا بىزگە ۇلكەن قورعان بولىپ وتىر»، – دەگەن.

ەردوعان بىرلەسكەن ءباسپاسوز مالىمدەمەسىندە ەۋروپا وداعىنا دەگەن وكپەلى ءۋاجىن جايىپ سالدى: «1963 جىلدان قازىرگە دەيىن ەۋروپا وداعى ءبىزدى كۇتتىرۋمەن بولدى. ەو-نىڭ ەشبىر ەلى مۇنداي زۇلىماتتى كورمەدى. بىزگە «ءيا» نەمەسە «جوق» دەگەن جاۋاپتى دا بەرمەدى. اشىعىن ايتۋى كەرەك ەدى. ءبىز سابىرلىقپەن كۇتۋدەمىز. دەگەنمەن، وسى جىلداردا ۆەنگريانىڭ ءبىزدى سوڭىنا دەيىن قولداعانىنا العىس بىلدىرەمىز»، – دەدى.

ۆەنگريا ساپارىنا ەردوعانمەن بىرگە جۇبايى ەمينە ەردوعان، پرەزيدەنت اپپاراتىنىڭ رەسمي وكىلى يبراحيم كالىن، ءسىم باسشىسى مەۆلۇت شاۆشوعلۋ، ساۋدا ءمينيسترى رۋحسار پەكجان، كومۋنيكاتسيا ءمينيسترى مەحمەت جاحيت تۋرحارن جانە ەردوعاننىڭ «ادىلەت جانە دامۋ پارتياسىنىڭ» ورىنباسار جەتەكشىسى جەۆدەت يلماز قاتارلى رەسمي وكىلدەر دە بارعان.

“The Qazaq Times”