فوتو: EURASIANEWS

جاقىندا رەسەي ۇلتتىق تولەم كەڭەسى ەۋرازيالىق ەكونوميكالىق وداق اياسىندا ورتاق ەلەكتروندى ۆاليۋتا جۇيەسىن ەنگىزۋدى ۇسىندى. ۇلتتىق تولەم كەڭەسىنىڭ رەسمي ەمەس، اۋىزشا ۇىسىنىسىن رەسەي قارجى مينيسترلىگى بىردەن قولدادى. بىراق رەسەي رەسمي ورگاندارى وزدەرى ۇسىنعان ۇسىنىستارىن وزدەرى قولداعانىمەن ەاەو-عا مۇشە وزگە مەملەكەتتەر قولدامادى. ءبىرىنشى كەزەكتە اتالمىش باستاماعا بايلانىستى قازاقستان ۇلتتىق ەكونوميكا ءمينيسترى تيمۋر سۇلەيمەنوۆ پىكىر ءبىلدىردى.

«ءبىز بۇنى قولدامايمىز. بۇل مەنىڭ جەكە ادام رەتىندەگى جانە ساياسي تۇلعا رەتىندەگى ۇستانىمىم. مەنىڭ ويىمشا، ۇلتتىق ۆاليۋتا بۇل ءانۇران، ەلتاڭبا، مەملەكەتتىك بايراق سياقتى تاۋەلسىزدىكتىڭ ءبىر بەلگىسى. سول سەبەپتى ونى قورعاۋ، ساقتاۋ جانە دامىتۋ ءبىزدىڭ مىندەتىمىز. قانداي دا ءبىر كۆازي-پروكسي ۆاليۋتالاردىڭ ەنۋىنە جول بەرىلمەيدى. بۇل باستاما رەسەيدىڭ رەسمي ورگاندارىنىڭ ۇسىنىسى ەمەس» - دەپ مالىمدەدى سۇلەيمەنوۆ.

بىراق «ەۋرازيالىق ەكونوميكالىق وداق اياسىندا ورتاق ەلەكتروندى ۆاليۋتا ەنگىزۋ رەسەيدىڭ رەسمي باستاماسى بولماسا دا»، بۇگىن ءبىز وسىعان دەيىن «ورتاق ۆاليۋتا» جونىندە كىمدەردىڭ قانداي مالىمدەمە جاساعانىنا قىسقاشا توقتالۋدى ءجون كوردىك.

2018 جىل. ەاەو ينتەگراتسيا جانە ماكروەكونوميكا ءمينيسترى تاتيانا ۆالوۆا:

 «ءبىز ءوزارا ساۋدا-ساتتىقتا ۇلتتىق ۆاليۋتالارىمىزدىڭ ۇلەسىن ارتتىرۋدى ايتىپ وتىرمىز. بۇل وتە ماڭىزدى. سەبەبى ماسەلە دوللارسىزدانۋ جونىندە بولىپ وتىر. 2025 جىلعا دەيىن ورتاق ۆاليۋتا نارىعىن قالىپتاستىرۋ قاجەت».

2015 جىل. بەلارۋس پرەزيدەنتى الەكساندر لۋكاشەنكو:

«سىزدەر ايتىپ جۇرگەن ورتاق ۆاليۋتا مەنىڭ پرەزيدەنتتىك كەزەڭىمدە بولادى دەپ ويلامايمىن.ورتاق ۆاليۋتا كۇن تارتىبىندە تۇرعان ماسەلە ەمەس. وعان كەلمەس بۇرىن 2025 جىلعا قالدىرىلعان وزەكتى ماسەلەلەردى شەشۋ قاجەت».

2016 جىل. رەسەي پرەزيدەنتى ۆلاديمير پۋتين:

«ەاەو اۋماعىندا ورتاق ۆاليۋتا ەنگىزىلە مە؟بۇل ۇلكەن سۇراق. دەسە دە، بولاشاقتا ۇيىمعا مۇشە ەلدەردىڭ ەكونوميكالارى تەڭەسكەن ۋاقىتتا بولۋى ابدەن مۇمكىن. بىزگە ەۋرووداقتىڭ قاتەلىگىن قايتالاۋعا بولمايدى.ولار ەكونوميكالاردىڭ ءار تۇرلىلىگىنە قاراماستان ورتاق ۆاليۋتا ەنگىزدى. سالدارىنان گرەتسيا ۇلكەن قيىندىقتارعا تاپ بولدى. سول سەبەپتى ءبىز بارلىعىن ەگجەي-تەگجەيلى زەرتتەپ، كەزەڭ-كەزەڭىمەن جۇزەگە اسىرۋىمىز قاجەت. بۇل ەرىكتى تۇردە جۇرەتىن پروتسەسس. اتالمىش ماسەلەدە ءبىزدىڭ كوزقاراستارىمىز ءبىر جەردەن شىعۋى كەرەك».

2015 جىل.قر ۇلتتىق ەكونوميكا ۆيتسە-ءمينيسترى تيمۋر جاقسىلىقوۆ:

«قازاقستان ەاەو اياسىندا ورتاق ۇلتتىق ۆاليۋتا ەنگىزۋگە بايلانىستى ناقتى جانە دايەكتى ۇستانىمدا. بۇل سۇراقتار قارالمايدى. ورتاق ۆاليۋتا ەنگىزۋ جونىندە ۇسىنىسى ەاەو كەلىسىمىندە جوق. سول سەبەپتى اتالمىش ماسەلەگە قاتىستى كەلىسسوزدەر جۇرگىزىلمەيدى».

"The Qazaq Times"