ءۇندىستاننىڭ ۆيتسە-پرەزيدەنتى پاكىستان شەكاراسىنداعى سالتاناتتى شاراعا قاتىستى. فوتو: VOA.

ءۇندىستان-پاكىستان اراسىندا 70 جىلدان كەيىن بەيبىتشىلىككە دەگەن تالپىنىس قايتا كورىنىس تاپتى. پاكىستان پرەمەر-ءمينيسترى يرمان حان ەكى ەل اراسىنداعى ترانسشەكارالىق «بەيبىتشىلىك كوريدورىن» قۇرۋعا كۇش سالۋدا. پاكىستان تارابى ۇندىستاندىق از ۇلت سانالاتىن سيكح قاۋىمداستىعىنا شەكارادان ءوتىپ، حرامدارىنا تاۋاپ ەتۋىنە جول بەرەتىنىن جەتكىزدى.

سيكح قاۋىمداستىعى تاۋاپ ەتەتىن اتالعان حرام «گۋردۆارا داربار ساحيب» دەپ اتالادى. ول وسى سەنىمدەگىلەر ءۇشىن ەڭ العاش سالىنعان عيباداتحانا جانە سيكحيزمنىڭ نەگىزىن سالۋشى گۋرۋ ناناكتىڭ ءومىرىنىڭ سوڭىندا مەكەندەگەن تۇراعى. تۇسىنىكتىرەك بولۋ ءۇشىن سيكحتالار تۋرالى توقتالا كەتەلىك، بۇل سەنىم ءۇندىستاننىڭ سولتۇستىك وڭىرىندە XV-XVI عاسىر شاماسىندا بارلىققا كەلگەن. ناناك بۇل سەنىمدە پاكىستاندىق مۇسىلماندار مەن ۇندىستاندىقتاردىڭ بىرىگۋىن ۋاعىزداعان.

ۇزاق ۋاقىتتان بەرى، ءۇندىستان تارابى اتالعان سەنىمدەگى ءۇندى حالىقتارىنىڭ ءوز عيباداتقانالارىنا تاۋاپ ەتۋىنە رۇقسات بەرۋىن تالاپ ەتىپ كەلدى. 1947 جىلى ءۇندىستان مەن پاكىستان بريتانيادان ءوز تاۋەلسىزدىگىن العاننان كەيىن، سيكحيزمنىڭ وتانى بولعان پەنجاب ەكىگە ءبولىنىپ قالدى.

دۇيسەنبى كۇنى، ءۇندىستاننىڭ ۆيتسە-پرەزيدەنتى نايدۋ پاكىستان شەكاراسىنا وتە جاقىن جەردەگى سالتاناتتى شاراعا قاتىستى. ال، بۇگىن پاكىستان تارابى ەكى ەلدىڭ بەيبىتشىلىك كوريدورى تۋرالى ءسوز قوزعادى. بۇل وڭتۇستىك ازياداعى يادرولىق قارۋعا يە ەكى ەلدىڭ اراسىنداعى سيرەك كەزدەسەتىن جاعداي. شامامەن 5 شاقىرىمدىق «بەيبىتشىلىك ءدالىزى»  ۇندىستاننىڭ رەتا-نااك قالاسىمەن پاكىستانداعى كارتاپۋردىڭ اراسىن جالعاستىرادى. رەسميلەردىڭ بەرگەن مالىمەتىنە قاراعاندا، بۇل ءدالىز 2019 جىلى قاراشادا گۋرۋ ناناكتىڭ 550 جىلدىعىنا وراي اشىلادى.

ەكى ەل اراسىندا قازىرگە دەيىن اۋقىمدى ءۇش رەت سوعىس بولعان. ونىڭ ەكەۋى كاشمير جەرىنە تالاس ءۇشىن بولدى. جالپى ءۇندىستان مەن پاكىستان اراسىنداعى قايشىلىق تىم كۇردەلى. شەكارالىق داۋ تەك ونىڭ ءبىر عانا پاراسى. مادەنيەت پەن سەنىمدەردىڭ كوپ تۇرلىلىگى ەكى ەلدىڭ ورتاق پىكىرگە كەلۋىنە قيىندىقتار تۋدىرادى.

“The Qazaq Times”