وزبەكستان ەكونوميكالىق تاۋەلسىزدىگىنەن ايىرىلۋى مۇمكىن

وزبەكستان ەكونوميكالىق تاۋەلسىزدىگىنەن ايىرىلۋى مۇمكىن.

رەسەي پرەزيدەنتى ۆلاديمير ءپۋتيننىڭ قازان ايىنىڭ 18-19 كۇندەرى ارالىعىندا تاشكەنتكە جاساعان ساپارىنان كەيىن باق وكىلدەرى وزبەك-رەسەي قارىم-قاتىناسىن جارىسا جازۋدا. ءبىرى ءپۋتيننىڭ بۇل جولعى ساپارىن «تاريحي ساتكە» بالاسا، ەندى ءبىرى بۇل ساپارعا «وزبەكستان ەكونوميكاسى وزگەنىڭ قولىنا وتۋدە» دەگەن باعا بەرۋدە.

ۆلاديمير ءپۋتيننىڭ تاشكەنتكە ساپارى شاۆكات ميرزيەەۆتىڭ ونى اسا جوعارى قۇرمەتپەن اۋەجايدان كۇتىپ الۋىمەن باستالدى. جۇرتتىڭ بارلىعى وزبەك باسشىسىنىڭ ءپۋتيننىڭ «اياعىن جەرگە تيگىزبەي» قارسى العانىن تالقىلادى، جازدى، سىزدى، ايتتى. بۇل كۇننىڭ ەمەس اپتانىڭ باستى جاڭالىعى بولدى. كەيىننەن وزبەكستاندىق باق قوس تاراپتىڭ كەزدەسۋ بارىسىندا قۇنى 27 ميلليارد دوللاردى قۇرايتىن 800-گە جۋىق قۇجاتقا قول قويعاندىعىن جاريالادى. ماسەلەنىڭ بارلىعى وسى جەردە باستالدى.

وزبەكستاندىق جورنالشىلاردىڭ جازۋىنشا، تاشكەنتتەگى باس قوسۋدا پۋتين مەن ميرزيەەۆ اۋىلشارۋاشىلىعىنان باستاپ، عارىشقا دەيىن، قاراپايىم ستانوكتاردان اسكەري تەحنيكالارعا دەيىنگى ارالىقتاعى كەلىسىم قۇجاتتارىنىڭ بارلىعىنا قول قويدى. جوعارىدا ايتقانىمىزداي كەلىسىمدەردىڭ جالپى قۇنى 27 ميلليارد دوللاردى قۇرادى. ونىڭ ىشىندە 27,1 ملرد دوللار ايماق ارالىق، 1,76 ميلليارد دوللار ساۋدا-ساتتىق، 25,3 ميلليارد دوللار ينۆەستيتسيالىق كەلىسىم قۇجاتتارى بار.

حالىقارالىق ساراپشىلار پىكرىنشە، ەگەر وزبەكستان بيلىگى ءدال وسى باعىتتا رەسەيمەن بىرلەسىپ جۇمىس ىستەي بەرەتىن بولسا، وندا الداعى بەس-ون جىلدا ءوزىنىڭ ەكونوميكالىق تاۋەلسىزدىگىنەن ايىرىلۋى مۇمكىن. سەبەبى رەسەي باتىس ەلدەرىمەن بولىپ جاتقان ساۋدا سوعىسىنان كەيىن ءوزىنىڭ تمد اۋماعىنداعى ىقپالىن ودان ارى ارتتىرۋعا كىرىسكەن. بۇعان ۆلاديمير ءپۋتيننىڭ تاشكەنت ساپارى الدىندا سوچي قالاسىندا وتكەن «ۆالداي» پىكىرتالاس كلۋبىنىڭ وتىرىسىندا سويلەگەن مىنا ءبىر ءسوزى دالەل: «قازىر ماسكەۋ ءۇشىن باتىستان قاراعاندا شىعىس ماڭىزدىراق. سوڭعى ۋاقىتتا الەمدە بولىپ جاتقان گەوساياسي جاعدايلاردان كەيىن رەسەيدىڭ ورتالىق ازياعا قايتىپ ورالۋى قالىپتى دۇنيە».

ءپۋتيننىڭ بۇل مالىمدەمەسىنەن كەيىن الداعى ۋاقىتتا رەسەيدىڭ قاي باعىتتا جۇمىس ىستەيتىنىن اڭعارۋ قيىن ەمەس. نەگىزىندە بىرقاتار حالىقارالىق ساراپشىلار توبى رەسەيدىڭ تمد اۋماعىندا كەڭەستەر وداعى تۇسىندا بولعان كولىك، تەمىر جول، ساۋدا-ەكونوميكالىق، اسكەري-تەحنيكالىق بايلانىستاردى قايتا قالپىنا كەلتىرۋگە قادامدار جاساپ جاتقانىن بۇعان دەيىن دە ايتقان. بۇل تاقىرىپ وسىدان بىرنەشە جىل بۇرىن قازاقستان، قىرعىزستان، بەلارۋس جانە رەسەي ەۋرازيالىق ەكونوميكالىق وداق قۇرعان تۇستا دا قىزۋ تالقىلانعان. بىراق قانشا تالقىلانسا دا «جابۋلى قازان جابۋلى كۇيىندە قالعان».

"The Qazaq Times"