تايۋان قىتاي رەسپۋبليكاسىنىڭ قۇرىلۋ كۇنىن تويلادى: اقش-تايۋان-قىتاي قاتىناسى شيەلەنىسە ءتۇستى

تايۋان (تايۆان) بۇگىن «قىتاي رەسپۋبليكاسى كۇنىن» اتاپ ءوتتى. ءار جىلى 10 قازان كۇنى تايۋاندا مينگونىڭ (قىتاي رەسپۋبليكاسى) قۇرىلعان كۇنى رەتىندە اتاپ ءوتۋ داستۇرگە اينالعان.  بۇل تۋرالى تايۋان تەلەارنالارى حابارلادى.

مينگونىڭ (قىتاي رەسپۋبليكاسىنىڭ) قۇرىلعانىنا 107 جىل تولۋىنا ارنالعان مەرەكەلىك شارا پرەزيدەنت سارايىنىڭ الدىنداعى ۇلكەن الاڭدا وتكىزىلىپ. سالتاناتتى شارادا اسكەري وركەسترلەردىڭ سۇيەمەلدەۋىندە، تايۋانداعى جەرگىلىكتى گاۋشان ۇلتىنىڭ ۇلتتىق ءبيى بيلەندى.

تايۋان پرەزيدەنتى ساي يڭۆىن قۇتتىقتاۋ سوزىندە قازىرگى تايۋان-قىتاي-اقش قاتىناستارى تۋرالى دا توقتالىپ ءوتتى. ول اقش ۆيتسە-پرەزيدەنتى مايك پەنستىڭ سوزىنە سىلتەمە جاساي وتىرىپ، بەيجىڭ بيلىگىنىڭ تايۋان مەن ءوڭىردىڭ قاۋىپسىزدىگىنە قاۋىپ توندىرگەنىن، الايدا، تايۋان ءوڭىردىڭ بەيبىتشىلىگى مەن تۇراقتىلىعىنا، دەموكراتيالىق دامۋىنا دەربەس ەل رەتىندە ءوز ۇلەسىن قوسىپ كەلە جاتقانىن اتاپ ءوتتى.

پرەزيدەنت ساي يىڭۆىن سوزىندە: «تايۋان(تايۆان) ءار ءتۇرلى سىناقتار مەن قاۋىپ الدىندا ورنىقتى قالپىنان جازباي، قىسىمداردى ءبىر جاقتى ەتىپ، تەرريتوريامىزدىڭ تۇتاستىعى مەن قاۋىپسىزدىگىن ساقتاۋىمىز كەرەك»، –  دەدى.

اقش تايۋانمەن 1913 جىلدان 1979 جىلعا دەيىن رەسمي ديپلوماتيالىق قاتىناستا بولعان. ال، 1979 جىلى 1 قاڭتاردا بەيجىڭ مەن ۋاشينگتوننىڭ رەسمي ديپلوماتيالىق بايلانىس ورناتۋىنان كەيىن قۇراما شتات پەن تايۋان اراسىنداعى ديپلوماتيالىق قاتىناس ءۇزىلدى.  بىراق، رەسمي ديپلوماتيادان تىس اقش ۇكىمەتى تايۋانمەن بولعان قارىم-قاتىناسىن ساقتاۋعا تىرىسىپ كەلدى. ايتالىق، «اقش-تىڭ تايۋانداعى ءىس باسقارۋ ورتالىعىن» (American Institute in Taiwan) قۇرعان.

تايۋان ماسەلەسى اقش پەن قىتاي اراسىنداعى ەڭ سەزىمتال ماسەلەلەردىڭ ءبىرى. قىتايدىڭ شىعىس وڭتۇستىك ازياداعى ىقپالىنىڭ كەڭەيۋىنە قارسى قۇراما شتاتتار تايۋاندى استىرتىن قولداۋدى دا جالعاستىرىپ كەلەدى. قازىر وڭتۇستىك قىتاي تەڭىزى ماسەلەسىندەگى اقش-قىتاي اراسىنداعى شيەلەنىس ورشىگەن سايىن، تايۋان تاقىرىبى ەكى ەلدىڭ رەسمي تۇلعالارىنىڭ سوزىندە ءجيى قايتالانا باستادى.

“The Qazaq Times”