ۋكراينا پرەزيدەنتى پەتر پوروشەنكو.

ۋكراينا پرەزيدەنتى پەتر پوروشەنكو بىرىككەن ۇلتتار ۇيىمىنا 1932-1933 جىدارى ۋكراينادا بولعان اشارشىلىققا بايلانىستى ارنايى قاۋلى قابىلداۋدى ۇسىندى.

پەتر پوروشەنكو بىرىككەن ۇلتتار ۇيىمىندا جاساعان ۇندەۋىندە: «قاراشا ايىندا ءبىز حح عاسىردىڭ ناۋبەتى، 1932-1933 جىلدارى ۋكراينادا ستالين رەجيمى قولدان جاساعان اشارشىلىق قۇرباندارىن ەسكە الامىز. وسىعان بايلانىستى بىرىككەن ۇلتتار ۇيىمىنا ادامزات تاريحىنداعى قايعىلى وقيعالاردىڭ ءبىرى رەتىندە ۋكراينادا بولعان اشارشىلىققا ارنايى قاۋلى قابىلداۋدى ۇسىنامىن» - دەپ مالىمدەدى.

ۋكراينادا 1932-1933 جىلدارى اشارشىلىق 3,5 ميلليون ادام كوز جۇمعان. قازىرگى تاڭدا ۋكراينادا بولعان اشارشىلىقتى الەم بويىنشا يزرايل سياقتى بىرنەشە مەملەكەتتەر گەنوتسيد دەپ تانىعان.

1932-1933 جىلدارى قازاقستاندا دا اشارشىلىقتان كوز جۇمعاندار سانى از بولعان جوق. بولجام بويىنشا، سول جىلدارى قازاق دالاسىندا حالىقتىڭ 22,42 پايىزى اشتىقتان قىرىلعان. بۇل شامامەن 1 ميلليون 258,2 مىڭ ادام. بىراق وسى كۇنگە دەيىن قازاقستان بيلىگى اشارشىلىق قۇرباندارىنا، ستالين رەجيمىنىڭ قاتىگەز ارەكەتتەرىنە مەملەكەتتىك دەڭگەيدە ەشقانداي ساياسي باعا بەرمەي كەلەدى.

"The Qazaq Times"